DILI, 29 maiu 2023 (TATOLI)—VIII Governu Konstitusionál, segunda ne’e, selebra ona kontratu ho empreza tolu ne’ebé sei halo dezenvolvimentu ba Aeroportu Internasionál Prezidente Nicolau Lobato, Comoro.
Ministru Transporte no Komunikasaun, José Agustinho da Silva, konsidera, aeroportu nu’udar odamatan boot nasaun no importante tebes, nune’e parte Governu aselera prosesu hodi bele realiza serimónia lansamentu fatuk dahuluk ba projetu.
“Polítika VIII Governu mak atu moderniza infraestrutura aeroportuáriu, nune’e rezultadu modernizasaun espera katak bele lori dezenvolvimentu di’ak liu iha sosiedade Timor-Leste ba sustentabilidade no produtividade ba kriasaun empregu no dezenvolvimentu iha setór sira, liuliu turizmu,” Ministru hato’o iha ámbitu asinatura kontratu, iha salaun MTK, Caicoli.
Dezenvolvimentu aeroportu sei hahú hosi faze pista, taxiway, torre kontrolu no área estasiona aeronave iha Aeroportu Comoro. Daudaun pista aviaun ho naruk metru 1.800,50, sei estende ba metru 2.100.
“Bainhira estende, entaun bele akomoda ona aviaun ho kapasidade boot. Aeroportu ne’e importante tebes hodi fasilita movimentu ema no sasán ne’ebé uza transporte aérea. Tanba ne’e ita hotu esforsu katak konstrusaun aeroportu ida-ne’e tenke prienxe rekezitu padraun organizasaun internasionál aviaun sivíl atu nune’e bele iha seguransa ba movimentu aéreu sira,” nia adianta.
Governante ne’e garante, durante konstrusaun pista ne’e sei la impede movimentu aéreu diáriamente.
Notísia relevante : Horta no Taur hakarak konstrusaun Aeroportu Comoro tenke realiza ona
Antes ne’e Governu deside ona prosedimentu aprovizionamentu infraestrutura Aeroportu Comoro, nune’e liuhosi prosesu naruk empreza manán-na’in iha rua hosi Indonézia, empreza PT Waskita Karya sei haree kona-ba konstrusaun infraestrutura ho totál orsamentu millaun $72,5, enkuantu empreza PT Amythas haree liu ba jestaun ho orsamentu millaun $6,28.
Enkuantu, empreza Japaun sei konstrui terminál pasajeiru ho orsamentu hamutuk millaun $385,62, ne’ebé orsamentu ne’e prevee hosi Estadu no povu Japaun.
Selebrasaun asinatura ne’e asiste direta hosi Prezidente Repúblika, José Ramos Horta, Primeiru-Ministru, Taur Matan Ruak, inklui membru Governu balun, na’in ba empreza rua, no Embaixadór Japaun iha Timor-Leste.
Jornalista : Antónia Gusmão
Editora : Julia Chatarina
