BOBONARO, MUNISÍPIU, SAÚDE

INCSIDA husu estudante Tekvok Malibaka prevene aan hosi HIV/SIDA

INCSIDA husu estudante Tekvok Malibaka prevene aan hosi HIV/SIDA

Imajen promosaun kombate moras HIV/SIDA iha Timor-Leste. Iha edifísiu INCSIDA, segunda (17/01). Imajen Tatoli/ Francisco Sony

MALIANA, 29 maiu 2023 (TATOLI)-Institutu Nasionál Kombate Human Immunodeficiency Virus-Síndrome da Immunodeficinecy Adquirida (HIV-SIDA), Institutu Públiku (INCSIDA, I.P), segunda ne’e, halo kampaña nasionál sensiblizasaun Informasaun kona-ba Vírus HIV no Moras SIDA ba estudante sira iha Eskola Tékniku Vokasionál (TEKVOK) Númeru II Malibaka Yamato Maliana, Munisípiu Bobonaro.

Diretora INCSIDA, Ivonia António Barros, esplika, vírus HIV no Moras SIDA ne’e nu’udar kazu mundiál ne’ebé mak konsege invade ona mundu no trasmite ona to’o Timor-Leste no dezde 2023 to’o agora kontinua rejista kada tinan.

Nia Subliña INCSIDA, I.P ho nia papél bazeia ba dekretu lei númeru 13, 27 novembru/2013 atu hala’o atividade sensibilizasaun no prevensaun iha territóriu nasionál.

Tanba   dadus hosi Ministériu Saúde hatudu Munisípiu Bobonaro okupa fatin daruak rejista aas kazu ne’e, tanba lokalizasaun Munisípiu ne’e iha kedas Fronteira ho Nasaun Indonézia.

Notisia Relevante:TL rejista ema na’in-1.526 infetadu HIV/AIDS inklui óbitu 166

“Kazu ne’e agora dadaun ne’e fó sai hosi Ministériu Saúde katak ita joven sira mak agora sa’e maka’as. Ne’ebé, ha’u husu ba alin sira, di’ak liu ita prevene duké ba kurativu tanba ita senti menikmati (goza) iha minutu lima, maibé ita terus to’o ita-nia vida remata” Nia hateten iha intervensaun ba atvidade ne’e.

Diretora ne’e mós apela ba estudante sira bainhira fila ba uma atu partila tutan ba inan-aman no fámilia sira nune’e bele kontribui ba luta kombate HIV/SIDA.

“Virus ne’e perigu ba ita-nia vida, tanba ita hotu hatene agora seidauk iha ai-moruk atu hamate virus ne’e. Só iha de’it ai-moruk para vírus ne’e labele multiplika tan. Entaun, mai ita hamutuk para luta kontra transmisaun vírus ne’e” nia alerta.

Profesór TEKVOK Malibaka Yamato, Julio Neves, konsidera matéria sira ne’ebé esplika durante sensiblizasaun ne’e ajuda tebes estudante sira kompriende no intende kona-ba meiu no métode sira ba prevensaun HIV/SIDA.

“Ami agradese, louva, ba Ministériu Saúde no INCSIDA liuhosi atividade sira hanesan ne’e bele hasa’e ami-nia oan sira-nia koñesimentu oinsá atu hadok-an hosi vírus ne’e no bele fahe mós informasaun ba fámilia sira seluk para moras ne’e labele da’et tanba durante sira barak mak sei menus informasaun kona-ba moras ne’e” manorin-na’in ne’e hateten.

Enkuantu, tuir planu atvidade ne’e aban tersa sei hala’o iha postu administrativu Bobonaro no Postu Administrativu Cailaco no sei hale’u ba munisípiu sira hotu.

Notísia Relevante:Saúde Bobonaro lakon kontaktu ho pasiente HIV/AIDS na’in-20

Jornalista: Sergio da Cruz

Editór       : Rafael Ximenes de A. Belo

iklan
iklan

Leave a Reply

iklan
error: Content is protected !!