MALIANA, 29 maiu 2023 (TATOLI) – Moras Infessaun Respiratóriu Aguda (IRA) no moras kulit hahú hosi fulan-jeneiru to’o abríl 2023 ne’e rejista aas iha sentru saúde komunitária Balibo, munisípiu Bobonaro.
Xefe Interinu Sentru Saúde Balibo, Napoleão Marques, konfirma tuir dadus pasiente ne’ebé sofre moras IRA hamutuk na’in-1,808, tuir kedas moras kulit 215, diarreia 112 ne’ebé rekolla mós hosi postu saúde komunitária sira.
“Moras ISPA mak primeiru lugár, kona-bá moras Infesaun Vias Respiratóriu nia sufisiente hela, tanba bainbain ami fó ai-moruk Paracetamol, fila ba uma depois hemu bee morna, depende ami haree ninia kauza, bainhira atu hetan tratamentu,” nia informa ba jornalista sira, iha kna’ar-fatin, segunda ne’e.
Atu prevene moras ne’e labele afeta beibeik ba komunidade sira, médiku ne’e mós orienta ona pesoál saúde sira atu halo promosaun saúde ba komunidade sira liuhosi programa vizita saúde iha família no programa SISCA.
“Atu nune’e komunidade sira bele hatoman-aan moris ho saudável,” Médiku jerál ne’e esklarese.
Enkuantu durante halo tratamentu besik tama ona ba trimestre daruak ne’e sentru saúde komunitária la rejista pasiente ho idade labarik no adulta lakon vida.
Jornalista : Sérgio da Cruz
Editór : Evaristo Soares Martins
