DILI, 29 maiu 2023 (TATOLI)—Membru Parlamentu Nasionál hosi Deputadu bankada KHUNTO, Luis Roberto, preokupa no husu Governu liu-liu minsitériu saúde atu kontrola ema indivídu balun ne’ebé laiha kursu médiku maibé faan ai-moruk tama-sai uma iha kapitál Dili.
“Husu Ministéiru Saúde atu kontrola liu-liu xineza sira agora iha kapitál Dili atu loké klínika no fatin prátika saúde ninian inklui timoroan balun, xineza sira hanorin to’o faan ai-moruk maske sira laiha kursu kona-ba médiku nian maibé sira faan ai-moruk tradisionál tama sai uma iha kapitál Dili,” Deputadu Luis Roberto hateten liuhosi reuniaun plenária PN, segunda ne’e.
Atuál Vise Prezidente Parlamentu Nasionál ne’e husu ba Ministéiru Saúde atu reforsa kontrola, karik nasaun ne’e fó liverdade ba sé de’it mak tama mai, maibé prienxe rekezitu balun atu faan ai-moruk ka loke sira-nia klínika ruma maibé agora ne’e, TL ita fó livre demais lahatene kontrola hosi Ministéiru Saúde ne’e oinsá loos.
Tanba, nia dehan, faan ai-moruk hanesan tradisional liu-liu ai-moruk tradisionál xineza nian hodi sirkula faan tama-sai uma iha kapitál Dili, hanoin ida-ne’e presiza kontrola másimu hosi Ministériu Saúde (MS).
Iha reuniaun plenária, Deputada CNRT Fernanda Lay, hato’o mós preokupasaun seluk hanesan membru komisaun C trata asuntu Finansa Públika liga ho iha semana kotuk atravesa fronteira ba Atambua-Indonézia hetan informasaun katak subsídiu alimentasaun selu la kompletu no laiha pagamentu ba tinan 2023 dezde janeiru to’o agora, nune’e husu Ministéiru Finansa atu toma atensaun.
Nia hatten, hanesan membru komisaun C nia parte haree mákina X-Ray ne’e desde fiskalizasaun PN tinan kotuk iha fulan dezembru ba to’o fronteira hato’o ona rekomendasaun maibé resposta seidauk iha.
Aleinde ne’e, nia hateten, Timor-Leste asina ona nota atendimentu iha imigrasaun iha fronteira liña internet la’o neineik liu.
“Dala ida tan husu ba Governu embora atu mandatu ramata hala’o didi’ak nia papél molok entrega ba Governu foun,” nia dehan.
Entretantu, iha plenária ne’e Deputadu sira mós foti kestaun lixu iha kapitál Dili no husu Governu atu tau atensaun, inklui kestaun sira seluk.
Jornalista : Nelson de Sousa
Editór : Cancio Ximenes
