iklan

OÉ-CUSSE (RAEOA)

Protesaun Sivíl sei rekupera uma 26 iha Oé-Cusse

Protesaun Sivíl sei rekupera uma 26 iha Oé-Cusse

Logotipu Autoridade Protesaun Sivíl. Imajen/Espesiál

OÉ-CUSSE 29 maiu 2023 (TATOLI) – Autoridade Protesaun Sivíl (APC) Rejiaun Administrativa Espesiál Oé-Cusse Ambeno (RAEOA), sei halo rekuperasaun uma 26 tanba sai afetadu hosi dezastre naturál.

Prezidente Autoridade Protesaun Sivíl Oé-Cusse, Inspetór Polísia, Herman Metan, hateten, durante ne’e Protesaun Sivíl servisu hamutuk parseriu sira mai hosi Kruz Vermella Timor-Leste, (CVTL, sigla portugés) Filiál Oé-Cusse, Autoridade RAEOA liuhosi Sekretária Rejionál Asuntu Edukasaun no Solidariedade Sosiál, Bombeiru verifika no halo asesmentu inklui oferese apoia emerjénsia.

Nune’e dezde janeiru to’o maiu 2023 ne’e, ekipa konjunta identifika família afetadu husi dezastre naturál hamutuk uma-kain 50, ho tipu dezastre lahanesan, balu uma aat totál iha 31, aat naton iha tolu (3) no aat kamán 11, uma ameasdu iha lima (5).

Tuir nia, APC mós rejista asidente ida (1), ahi-han uma iha haat (4), anin bo’ot sobu uma iha 26, inundasaun uma-kain ida (1) no rai halai estraga uma 18.

“Tan ne’e, dadús aktuál to’o maiu 2023 ne’e, sira-ne’ebé hetan ona verifikasaun atu hetan apoia rekuperasaun atu hetan uma hamutuk uma-kain 28, tanba sai vítima iha dezastre naturál,” Herman Metan ko’alia iha Oé-Cusse, segunda ne’e.

Nune’e atu implementa apoiu ne’e, APC Oé-Cusse simu ona formatu hosi nasionál hodi halo verifikasaun ba estatutu rai, no sei husu família afetadu dezastre naturál, kona-bá propriedade rai, rai privadu ka rai Estadu, disputa ka hela iha zona risku no área protejida.

“Tan ne’e atu hetan rekuprasaun uma, ekipa konjunta mós prepera pergunta lima (5), prioridade bá rai, sé enkuantu nia hela iha rai abandonadu, rai Estadu, rai disputa, hela iha fatin risku sei laiha direitu hetan rekuperasaun uma,” nia katak.

Formatu ne’e foin mak implementa hahú maiu ne’e ba oin, sei husu família afetadu sira-nia estatutu rai ne’ebé sira hela bá, nune’e bele ajusta ho lei ne’ebé iha.

Tuir nia, lista ne’ebé ekipa konjunta verifika uma 28 ne’e kobre hotu sub-rejiaun haat, Oésilo Pássabe, Nítibe no Pante Makasar pertensia bas uku 18.

Entretantu, apoia emerjénsia ne’ebé maka oferese ba vítima inséndiu ka dezastre seluk iha faze dahuluk fornese apoia emerjénsia item rua, food item hanesan foos, supermie, sardina ikan-lata, mina bimoli, susu-been, enkuantu la’ós food item hanesan sasán dapur nian, lona, bikan kanuru, sanan no tasu, inklui seluktán.

 

Jornalista: Abílio Elo Nini

Editór      :Rafael Ximenes de A. Belo

iklan
iklan

Leave a Reply

iklan
error: Content is protected !!