DILI, 29 maiu 2023 (TATOLI) – Xefe Sentru Saúde Vera Kruz, Marilia Piedade, dehan iha fulan abríl moras ne’ebé mak rejsita makas iha Sentru Saúde Vera Kruz mak Infesaun Vias Respiratóriu Aguda (ISPA) hamutuk 1.342.
“Iha fulan abríl, ne’e moras ne’ebé aas iha Sentru Saúde Vera Kruz mak Infesaun Vias Respiratóriu Aguda hamutuk 1.342 ne’ebé afeta ba labarik kiik no mós ema boot sira”, Marilia Piedade informa iha nia kna’ar fatin Vera Kruz, ohin.
Nia dehan, moras ISPA ne’e kauza husi rai rahun sira tanba udan, entaun halo rai rahun makas hodi afeta ba ema moras tanba ne’e husu ba komunidade sira katak bainhira mear, inus-been tenke halo tratamentu saúde iha fasilidade saúde ne’ebé mak besik.
“Atu halo prevensaun ida ne’e mak tenke uza maskara no evita labarik sira halimar iha rai rahun laran atu moras sira ne’e labele mosu”, nia hateten.
Nia esplika, kona-ba ekipamentu no medikamentu sufisiente atu halo atendimentu ba pasiente sira ne’ebé mak halo tratamentu iha Sentru Internamentu Vera Kruz.
“Ita-nia rekursu umanus, ita-nia medikamentu no ekipamentu sufisiente hodi halo atendimentu ba pasiente sra ne’ebé mai halo tratamentu iha ne’e”, nia subliña.
Sentru Saúde Vera Kruz mós rejista moras sira hanesan diárea hamutuk 255, pneumonia 22, scabies 18, moras kulit seluk 264 no asidente tráfegu 11.
Jornalista : Felicidade Ximenes
Editór : Zezito Silva
