BAUCAU, 29 maiu 2023 (TATOLI) – Sekretáriadu Tékniku Administrasaun Eleitóral (STAE) munisípiu Baucau sei realiza misa hodi agradese ba susesu realizasaun Eleisaun Parlamentár tinan-ne’e.
Diretór STAE Munisípiu Baucau, Natividade Freitas Guterres, esplika, durante realizasaun Eleisaun Parlamentár iha Baucau laiha fallansu tanba durante preparasaun esplika kona-ba lala’ok inklui prosesu hotu ligadu ho Eleisaun Parlamentár.
“Sira-nia kontratu sei termina iha loron-30 juñu tanba-ne’e sira sei ativu iha edifísiu atu prepara ba misa hodi agradese ba susesu Eleisaun Parlamentár tinan-ne’e iha Baucau,” Diretór STAE Baucau informa ba Agência TATOLI iha vila nova, segunda ne’e.
Bainhira Eleisaun Parlamentár laiha reklamasaun no dúvida ruma entre brigadista ho fiskais partidu polítiku sira iha sentru votasaun tanba iha intendementu inklui kolaborasaun di’ak iha terrenu ne’ebé sai diferénsia ho eleisaun seluk périodu liubá.
Natividade Guterres, argumenta, mezmu foin asume kargu nu’udar jerente maibé esperiénsia nu’udar ofisiál iha STAE Baucau tinan barak ona nune’e halo ajustamentu no mellora sistema hodi fó susesu ba Eleisaun Parlamentár.
Mudansa ne’ebé halo mak hanesan aloka fatin rua hanesan salaun apuramentu no edifísiu STAE ne’ebé kontribui ba aselera distribusaun materiál eleisaun ba sentru votasaun hotu iha postu admistrativu neen – Baucau vila, Laga, Quelicai, Baguia, Venilale no Vemase.
“Durante apuramentu laiha diskusaun hanesan uluk, hotuhotu simu malu tanba fiskais sira haree akta ne’ebé hatama hanesan ho dadus orijinál iha sentru votasaun,” Natividade Guterres akresenta.
Tuir planu STAE sei realiza misa agradesementu inklui halibur hikas entidade hotu hanesan Autoridade Admistrasaun Munisipál, Partidu polítiku, PNTL no observadór sira iha Baucau hanesan parte ida hato’o apresiasaun ba kolabrasaun durante realizasaun Eleisaun Parlamentár tinan-ne’e.
Brigadista iha STAE Baucau ba Eleisaun Parlamentár tinan-ne’e hamutuk 150 ne’ebé asina kontratu ho durasaun fulan-haat hahú iha fulan-marsu no termina iha fulan-juñu.
Jornalista : Natalino Belo
Editór : Rafael Ximenes de A. Belo
