ILO entrega planu implementasaun Estratéjia Nasionál Protesaun Sosiál ba MSSI
DILI, 29 maiu 2023 (TATOLI)—Diretór Jerál Ministériu Solidariedade Sosiál no Inkkuzaun (MSSI), Florêncio Pina Dias Gonzaga, hateten horisehik Reprezentante Organizasaun Internasionál ba Traballu, dezignada ho ILO iha Timor-Leste, entrega planu no implementasaun Estratéjia Nasionál Protesaun Sosiál (ENPS) ba Ministériu Solidariedade Sosiál no Inkluzaun, hodi hala’o servisu liga ho asuntu sosiál nian.
Notíisia Relevante: Estratejia nasionál protesaun sosiál koloka sidadaun iha sentru atividade governativa
“Ita servisu hamutuk ILO no ita konsege define ona planu implementasaun tinan 2022-2023, no buat ne’ebé mak ita define ona iha planu estratéjiku nasionál. Nune’e, horiseihk ILO entrega ona dokumentu estratéjiku nasionál ba Vise MSSI, Signi Verdial. Nune’e, tempu badak sei atribui ba ministériu kompetente sira hodi la’o tuir,” Florêncio Pina Dias Gonzaga hateten ba Agência Tatoli, iha nia kna’ar fatin Caicoli, Dili, tersa ne’e.
Hosi Planu estratéjiku nasionál ne’e, nia dehan, iha objetivu tolu mak hanesan halo redusaun ba kiak, protesaun ba traballadór sira no reforsa kapasitasaun institusionál.
Vise Ministra Soslidariedade Sosiál no Inkluzaun, Signi Verdiál, hateten ENPS ne’e dezenvolve tuir evolusaun ba situasaun kada tinan no mós haree ba inflasaun iha Timor-Leste.
Ezemplu, nia dehan, reforma Bolsa da Mãe Jerasaun Foun, hasa’e osan ba idozu sira tanba inflasaun ne’e aumenta, protesaun ba traballadór sira liuhosi Institutu Nasionál Seguransa Sosiál (INSS) fó protesaun ba traballadór sira iha empreza inklui atribui subsídiu ba sira.
“Ita sei kontinua nafatin hala’o servisu sira-ne’ebé ita hala’o ona. Ba oin, ita buka atu mellora liután servisu liu-liu ligadu ho dadus estatístika. Tan ne’e, iha tempu badak ita sei lansa buletin estatístika, nu’udar aspetu importante ida-ne’ebé ita kuaze la hala’o iha ita-nia rain. Ita nunka abitua uza númeru ba iha ita-nia prosesu planeamentu sira,” nia hateten.
“ENPS ne’e modelu ida di’ak no ita agradese tanba Timor-Leste bele iha ENPS, tanba liuhosi ENPS ita konsege hala’o mudansa ida iha kontestu polítika sosiál iha Timor-Leste liuhosi estratéjia ne’e ho ninia planu implementasaun sira anuálmente,” nia dehan.
Ligadu ho atinjimentu, nia hateten, iha komponente importante tolu iha ENPS mak kompostu husi redusaun ki’ak, protesaun ba traballadór sira no reforsa kapasitasaun institusionál.
Ko’alia kona-ba kapasitasaun profisionál ba funsionáriu liga ho planu, tuir nia, monitorizasaun no avaliasaun; entretantu kona-ba ki’ak ne’e Timor-Leste ninia liña pobreza pruvolta 42%; no atinjimentu boot ida iha MSSI mak programa Bolsa da Mãe Jerasaun Foun ne’ebé kontribui tebes ba hamenus má nutrisaun iha Timor-Leste.
Atinjimentu balun ligadu ho ratifikasaun ba Konvensaun Internasional ba Ema ho Defisiensia ne’ebé iha ona faze implementasaun, nune’e mós hasa’e subsídiu ba idozu husi $50 kada fulan ba $57.
Nune’e, iha enkontru ida ohin ko’alia uitoan kona-ba atinjimentu sira iha ENPS, liga ho relatóriu anuál implementasaun ENPS iha tinan 2022.
Tuir planu, sei hala’o konferênsia imprensa ida ko’alia kona-ba atinjimentu sira iha tinan 2022 nian, ENPS 2021-2030 ne’e Governu lansa ona iha Novembru 2021 no ninia implementasaun anulamente.
Jornalista : Osória Marques
Editór : Cancio Ximenes
