VIQUEQUE, 30 maiu 2023 (TATOLI)—Irrigasaun área Daradau, suku Veasoru, postu Uatulari, munisípiu Viqueque funsiona ona ba natar ektare 340, hafoin tinan barak nia laran abandonadu.
“Maski seidauk halo serimónia inaugurasaun maibé daudaun ne’e bee tama ona ba natar hodi agrikultór sira halai natar ektare 460 ne’ebé abandona, maibé foin halo ektare 340, sei falta ektare 120 mak seidauk halo. Natar ne’ebé agora seidauk bele uza tanba irrigasaun a’at kuaze tinan barak nia-laran, nune’e ai-moris boot hotu. Tanba ne’e, presiza mákina pezadu hodi hamoos ai-horis sira,” Diretór Servisu Agrikultura munisípiu Viqueque, Fernado Joaquim, informa ba Agência Tatoli, iha ninia knaar fatin, Beloi, tersa ne’e.
Nia haktuir, natar balun iha parte Daradaun iha ona desde tempu portugés no balun agrikultór sira abandona desde tempu okupasaun Indonézia tanba kondisaun irrigasaun labele fornese bee ba natar.
Nune’e, Governu liuhosi Ministériu Agrikultura no Peska (MAP) iha tinan 2019 prevee orsamentu infraestrutura purvota millaun $3 hodi harii irrigasaun Daradau, ne’ebé toma konta hosi empreza internasionál Pembinaan Pulau Sebang SDN. BHD hosi Malaysia.
Projetu irrigasaun Daradaun kompostu hosi kanál prinsipál metru 1.616 no sekundáriu metru 3.519.
Notísia relevante : Abitante Bahatata Viqueque husu MAP normaliza irrigasaun liga bá natar Daragata
Tuir Diretór MAP Viqueque, natar ektare 120 presiza hamoos ai tanba iha ai-hun boot halo agrikultór sira labele halo atividade.
“Foin lalais ne’e, ita-nia autoridade no agrikultór sira haruka pedidu ba ami hodi apoiu ekipamentu pezadu hodi hamoos ai maibé to’o agora seidauk realiza tanba ita-nia ekipamentu pezadu limitadu tebes. Ami sei buka meiu atubele rezolve agrikultór sira-nia preukupasaun,” nia hato’o.
Fernado Joaquim dehan, natar parte Daradau poténsia boot ba hare, nune’e bainhira agrikultór sira konsege utiliza hotu natar ne’e, sei hasa’e produsaun hare iha rai-laran.
“Iha Viqueque natar barak maibé irrigasaun barak ho kondisaun a’at no seidauk rezolve hotu,” Diretór tenik.
Suku Vessoru kompostu hosi aldeia hitu hanesan Balabasiba, Mau-Boru, Culu-Dere, Baha-o, Uani-Uma, Baha-Buga no Matau ho totál populasaun 1.519, kompostu hosi mane 785 no feto 734 (sensu tinan 2015).
Jornalista : Vitorino Lopes da Costa
Editora : Julia Chatarina
