DILI, 30 maiu 2023 (TATOLI)—Fratrum Minorum iha Timor-Leste (OFM-TL) planeia harii santuáriu ba relíkia Santo António iha Fatubeliu, iha tinan oin mai.
“Ita planeia sei harii fatin santuáriu iha Fatubeliu, munisípiu Manufahi, ho objetivu Santo António nia relíkia mai ne’e ba Franciscano, entaun sarani sira iha Fatuberliu oferese sira-nia rai hodi harii iha ne’ebá mak sarani sira ne’ebé iha devosaun ba Santo António bele bá vizita,” Superiór Ordo OFM-TL, Frei Nicolao José Florentino, hateten liuhosi programa entrevista eskluziva iha estúdiu Farol, tersa ne’e.
Tinan ne’e halo ona dezeñu atu harii santuáriu Santo António, ne’ebé sei foti modelu tuir kultura Timor.
“Ami iha planu no programa atu harii fatin dignu ba Santo António bolu Santuáriu, maibé atu realiza ida-ne’e ami loke ami-nia odamatan no liman ba sarani sira no ba ema hotu ne’ebé iha devoasaun ba Santo António atu kontribui, ami simu ho laran no hein iha fatin Welahu Fatuberliu Same,” nia akresenta.
Notísia relevante : Don Virgílio inaugura Jardín Orasaun Santo António Bedois
Aleinde ne’e, santuáriu ne’e ba futuru sei transforma sai fatin turizmu espirituál nune’e bele atrai vizitante lokál no estranjeiru.
“Ami laiha osan atu hala’o serbisu ne’e, maibé bele hamutuk ho hanoin buat hotu sei la’o di’ak no ami mós planeia sei koordena ho parte Governu hodi apoiu,” nia tenik.
OFM-TL halo esforsu lori sai Santo António nia relíkia ba sarani sira atu hatene koñese loloos.
“Santo António nia liafuan ba ema hotu keta haluha adora Maromak tanba nia ne’e hanesan ponte no motivadór ida entre ita ho Maromak,” nia hameno.
Jornalista : Arminda Fonseca
Editora : Julia Chatarina
