Ohin, Prezidente Repúblika dezloka ba Korea
DILI, 30 maiu 2023 (TATOLI)—Prezidente Repúblika (PR), José Ramos Horta, tersa ne’e, ho delegasaun dezloka ba Repúblika Korea hodi hala’o vizita Estadu.
Tuir komunikadu hosi mídia Palásiu Prezidensiál ne’ebé Agência Tatoli asesu, katak vizita Xefe Estadu hahú hosi loron 30 fulan-maiu to’o loron 03 fulan-juñu tinan 2023, ho objetivu atu partisipa iha forum Jeju, nune’e mós atu sai oradór prinsipál ho tema ‘Paz no Prosperiedade’.
Durante vizita kortejia ba Korea Sul, Prezidente Republika sei hala’o sorumutu ho Ninia omólogu Prezidente Korea.Yoon Suk Yeol.
Aliénde ne’e, Prezidente Republika mós sei hola parte iha jantar ofisial ne`ebé oferese hosi Governadór Provínsia Jeju nian.
Iha vizita Estadu ne’e, PR mós sei vizita Kuartel Jerál SK E&S no SK Forest, kompañia rua ne’ebé inviste iha Timor Leste.
Tuir agenda, Prezidente Republika mós sei hala’o enkontru ho instituisaun públiku no privadu hodi husu tulun hodi harii eskola téknika vokasional ba joven timoroan sira.
PR mós sei akompaña hosi delegasaun ida hosi ANPM (Ajensia National Petroleu no Minerál) atu explora tan esperiénsia no oportunidade kona-ba investimentu iha projetu armajenamentu no kaptura karbonu iha instalasaun hosi kampu petrolíferu iha Bayu Undang.
Vizita Kortejia ida-ne`e mai ho objetivu atu hametin lasu amizade entre nasaun Timor-Leste ho Korea Sul, nune’e mós atu identifika setór produtivu balun ne’ebé ligadu ho kooperasaun ekonómika iha futuru.
Hafoin ramata vizita iha Korea Sul, iha loron 04 juñu, Prezidente Repúblika sei kontinua vizita ba nasaun Singapura hodi partisipa iha Simeira Asia nian kona-ba Seguransa ba dala-20.
Prezidente Republika nu’udar úniku Xefe Estadu estranjeiru ne’ebé hato’o diskursu iha sesaun plenária daneen ba Diálogu Sangri-La kona-ba Parseria ba Seguransa iha Asia Pasífiku.
Durante vizita iha Singapura, Prezidente Repúblika, sei hala’o enkontru ho Ministru Defeza Singapura nian, Dr. Ng Eng Hen, no sei partisipa mós iha jantar ofisiál, oferesidu hosi Prezidente Repúblika Singapura, Halimah Jacoob.
Entertantu, hahú hosi fulan maiu tinan 2022, Prezidente Repúblika hala’o ona vizita Estadu ba Estadu Indonézia, Austrália, Portugál, Reinu Kamboja, Singapura, no mos vizita serbisu ba Brazil, Qatar no Azerbaijan.
Prezidente Repúblika ho delegasaun sai hosi Timor-Leste iha loron 30 fulan-maiu ne’e ho distinu ba Korea Sul, no sei sai hosi Seoul ba Singapura iha loron 03 fulan-juñu, no sei to’o hikas fali iha Timor-Leste iha loron 05 fulan-juñu tinan 2023.
Jornalista : Nelson de Sousa
Editór : Cancio Ximenes
