OMS husu MS mantein hasa’e koñesimentu populasaun ba risku tabaku
DILI, 30 maiu 2023 (TATOLI) — Reprezentante Organizasaun Mundiál Saúde (OMS) iha Timor Leste, Arvind Mathur husu Ministériu Saúde (MS) atu kontinua hala’o asaun sensibilizasaun hodi hasa’e koñesimentu populasaun nian kona-ba risku husi konsumu tabaku hodi prevene moras la hada’et.
“Iha pontu importante ne’ebé mak ami halo iha Timor-Leste mak nafatin husu ba Ministériu Saúde hasa’e nafatin koñesimentu ita-nia populasaun sira iha Timor-Leste kona-ba komprensaun risku no mós afetasaun husi konsumu tabaku”, Arvind Mathur informa ba TATOLI iha nia kna’ar fatin Caicoli, ohin.
OMS nafatin servisu ho Governu Timor-Leste hodi diskute barak liu kona-ba politika sira liuliu ba lei kontrolu tabaku sira ne’ebé mak iha Timor-Leste.
Iha sorin seluk, Minsitra Saúde Odete Maria Freitas Belo, hateten OMS iha inisiativa hakarak atu redúz, hakarak prevene moras la hadaet sira tanba Timor-Leste maioria konsumu tabaku hodi afeta ba sira nia saúde.
“Koalia kona-ba prevensaun ema hodi labele fuma, ami sei servisu hamutuk ho entidade barak hodi redúz no halo prevensaun ba moras ida ne’e. Maibé hahú husi ita-nia uma laran tenke hapara fuma atu bele redúz moras sira”, nia afirma.
Jornalista : Felicidade Ximenes
Editór : Zezito Silva
