MALIANA, 30 maiu 2023 (TATOLI) – Provedoria Direitu Humanu no Justisa (PDHJ), Delegasaun Territoriál Maliana, observa servisu órgaun administrasaun eleitorál komposta hosi Sekretariadu Tékniku Administrasaun Eleitorál (STAE) no Komisaun Nasionál Eleisoens (CNE, sigla portugés) iha prosesu eleisaun parlamentár to’o apuramentu munisipál remata la’o ho imparsiál no neutralidade.
Diretór PDHJ Delegasaun Territoriál Maliana, Domingos Pinto Tavares, hateten maski iha ámbitu eleisaun parlamentár, 21 maiu la’o órgaun eleitorál hasoru difikuldade liu-liu kazu sidadaun ida nudar fiskais hosi Partidu Polítiku balu nia tenta vota doubru,maibé ne’e laos failansu hosi STAE-CNE tanbá ne’e aktus individuál.
Notísia relevante:PDHJ Bobonaro rejista keixa boa governasaun-violasaun direitu umanu hitu
“Instituisaun rua nia serbisu ne’e di’ak tebes, organizadu tebes, koordenasaun ho liña setoriál sira mós di’ak tebes to’o ohin loron. Tuir ha’u-nia haree sira serbisu ho transparánsia, imparsiál no neutral tanba to’o agora laiha fiskalizadór ka fiskál hosi partidu ida ka estrutura partidu ida mak halo reklamasaun ba STAE ka ba CNE, ne’e katak buat hotu-hotu la’o ho di’ak mak rezultadu ba tia Dili ne’e,” nia informa ba jornalista sira, iha knaar-fatin, tersa ne’e.
Tanba ne’e PDHJ rekomenda ba instituisaun rua ne’e atu serbisu ho profesionál no kaer nafatin lema ne’ebé iha nune’e eleisaun iha futuru mai bele hatudu rezultadu di’ak liután.
“Atu ema hotu bele tranparante, ema hotu bele satisfaz, povu hotu bele simu kualkér rezultadu saida de’it, tanba nia rezultadu ne’e mak sei lori moris ba ita hotu,” nia rekomenda.
Notísia relevante: PDHJ Bobonaro identifika funsionáriu edukasaun na’in-10 partisipa iha kampaña eleitorál
Jornalista : Sérgio da Cruz
Editór : Evaristo Soares Martins
