DILI, 30 maiu 2023 (TATOLI)—Prezidente Parlamentu Nasionál (PPN), Aniceto Longuinhos Guterres Lopes, tersa ne’e, hala’o enkontru ho Primeiru-Ministru (PM), Taur Matan Ruak, hodi kongratula VIII Governu Konstitusionál ne’ebé organiza eleisaun parlamentár tinan 2023 ho susesu.
Notísia Relevante: Taxa partisipasaun eleisaun parlamentár 2023 atinje 79,28%
“Ida-ne’e hanesan mós ho Prezidente Repúblika no kongratula Primeiru-Ministru Jenerál Taur Matan Ruak susesu kondús prosesu demokrátiku hanesan eleisaun ida-ne’ebé hahú ne’e, kuandu Governu ladún preparadu maibé buat hotu la’o di’ak, kalma entermu seguransa laiha problema ne’ebé seriu, ne’e susesu Governu ninian. Tambá ne’e mak, ohin, ha’u husu audiénsia ho Primeiru-Ministru atu felisita nu’udar Xefe Governu ba VIII Governu nian,” Prezidente Parlamentu Nasionál ne’e hateten ba jornalista sira hafoin ramata enkontru ho Xefe Governu iha Parlamentu Nasionál.
Aleinde ne’e, PPN ho PM mós ko’alia kona-ba ajenda ba transferénsia Governu foun no lejislatura foun iha tempu tuir mai.
“Ko’alia mós oinsá atu asegura ajenda Estadu ninian iha tinan ne’ebé iha ezijénsia barak, transferénsia hosi Governu ida ba Governu seluk no transferénsia hosi lejislatura ida ba lejislatura daneen tuir mai,” nia hateten.
Antes ne’e, iha loron 26 maiu ne’e, PPN mós hala’o enkontru ho Prezidente Repúblika (PR), José Ramos Horta, iha Palásiu Prezidensiál Nicolau Lobato, Bairru Pite, hodi ko’alia kontinuidade funsionamentu órgaun Estadu liuliu tranzisaun ka transferénsia hosi Governu ida ba Governu seluk no hosi lejislatura ida ba lejislatura seluk.
Nune’e, órgaun Estadu tenke tuur hamutuk ko’alia ba kontinuidade ba funsionamentu órgaun Estadu sira no oinsá ajusta prosesu ida-ne’e to’o buat hotu funsionamentu normál fila-fali.
Prezidente Parlamentu Nasionál ne’e, seida’uk fó sai kona-ba PN iha lejislatura ne’e nia mandatu termina to’o bainhira, mezmu antes ne’e Primeiru-Ministru rasik hato’o katak Governu preparadu halo tranzisaun ba Governu foun no sei halo reuniaun Konsellu Ministru ikus iha 07 juñu 2023.
“Iha interpretasaun barak, maibé interpretasaun ikus ne’e só Parlamentu Nasionál mak hola desizaun ne’e plenária Parlamentu la’ós Prezidente Parlamentu,” nia hateten.
Jornalista : Nelson de Sousa
Editór : Cancio Ximenes
