Tinan ne’e MS introdúz vasina HPV iha TL
DILI, 30 maiu 2023 (TATOLI) – Ministra Saúde Odete Maria Freitas Belo, dehan tinan ne’e sei introdúz vasina Human Papilomavirus (HPV) iha Timor-Leste.
“Vasina Human Papilomavirus ida ne’e ami sei introdúz iha tinan ida ne’e ba ita-nia labarik feto sira atu prevene moras kankru sira”, Odete Maria Freitas Belo informa iha HNGV, ohin.
Nia dehan, Ministériu Saúde sei konsulta ho lojístika sira atu haree ba vasina no oinsá ho fatin atu rai vasina sira.
“Ami sei haree fila fali ita-nia lojístika vasina ne’e sosa ona ka lae, fatin seguru atu rai ka lae no oinsá ita-nia orsamentu atu fó ba ita-nia pesoál saúde sira ba halo atividade vasinasaun iha munisípiu sira”, nia afirma.
Nia hateten, ekipa NITAG halo ona rekomendasaun mai iha Ministériu Saúde atu implementa vasina HPV ba labarik feto sira hodi redúz moras kankru iha Timor-Leste.
“Ekipa NITAG sira hato’o ona rekomendasaun mai iha MS atu implementa vasina HPV, ida ne’e ba ita-nia labarik feto sira hodi bele redúz moras kankru iha ita-nia rain tanba vasina ne’e hanesan meius ida atu bele prevene kankru”, nia subliña.
Nia informa etapa dahuluk hetan apoiu husi UNICEF no GAVI ba vasina HPV no tuir mai Ministériu Saúde sei koloka orsamentu hodi bele kompras rutina ba vasina ida ne’e.
Jornalista : Felicidade Ximenes
Editór : Zezito Silva
