COVALIMA, 31 maiu 2023 (TATOLI)–-Xefe Suku Tashilin, postu administrative Zumalai, munisípiu Covalima, Martinho Magno, hateten ema deskoñesidu asalta komunidade Tasihilin iha segunda (29 maiu 2023) madrugada ne’e, estraga motorizada hitu (7), uma 10 no ema na’in-ida (1) kanek todan no agora baixa hela iha Ospitál Referál Suai.
Ema deskoñesidu ne’e deskonfia hosi membru Grupu Arte marsiál (GAM) balun ne’ebé mak organiza-aan hodi asalta komunidade nia uma.
“Ha’u nu’udar lideransa hodi halikar dehan kalma ema la fiar ha’u. Entaun, sira mai ha’u-nia uma, ha’u-nia motorizada Estadu ho nia xapa mátrikula 3622 GA baku rahun hotu. Nune’e, totál motorizada hitu (7) sira baku rahun, estraga uma 10, baku rahun meza-kadeira kuaze 20, kioske ida (1) no ha’u-nia mane foun rasik kanek todan ne’ebé agora baixa iha Ospitál referál Suai,” Xefe suku Tashilin, Martinho Magno, hateten ba jornalista sira iha suku Tashilin, kuarta ne’e.
Membru Grupu Arte Marsiál (GAM) balun ne’ebé asalta komunidade iha suku Tashilin ne’e akontese, bainhira komunidade suku Tashilin halo inaugurasaun ba uma-lisan maibe la hala’o festa, no joven na’in-haat (4) tuur iha eskola EBF Tashilin hodi halimar Game, derrepente joven na’in-haat ho grupu arte marsiál balun ne’e mai tuda joven na’in-haat ne’e.
“Nune’e, joven na’in-haat tauk fila ba uma hodi fó hatene ami dehan ema tuda ami. Entaun, iha bariru laran ema barak. Sira hosi parte Bora Ikun sira hakiduk, hafoin hosi bairru Bora Ikun lori lámpda leno tuir dalan tuda uma rahun, estraga motorizada, kioske ida,” nia hateten.
Akontesimentu ne’e akontese, iha loron ne’e kedas, xefe suku mós halo kedas kontaktu ba Ofisiál Polisía Suku (OPS), hodi liga ba eskuadra Zumalai hatu hakalma situasaun iha suku Tashilin.
Vítima Joana dos Reis hateten, nia parte trauna no husu Polísia Nasionál Timor-Leste (PNTL) atu halo investigasaun nune’e autór sira responsabiliza ba aktu krime ne’ebé joven hosi grupu arte marsiál balun asalta komunidade iha suku Tashilin, postu Zumalai, munisípiu Covalima.
“Iha segunda (29 maiu 2023), iha ami-nia suku laran, ami hanesan povu baibain lahatene motivu hosi problema ne’e, tanba derrepente membru órganizasaun arte marsiál balun mai asalta ami, nune’e presiza halo investigasaun kle’an,” nia dehan.
Maske membru GAM sira asalta malu, vítima Joana ho brani hatan ba sira razaun saida mak tuda ninia uma uma no nia sala saida, hafoin ne’e membru GAM hatán katak ferik nonok no sé lae ami tetak tiha, nune’e vítima Joana ho brani sai hosi uma laran, hamriik iha uma oin hodi hatán katak mai tá ba tanba nia labele halai.
Komandante PNTL Munisípiu Covalima, Superintendente Basílio de Jesus, hateten durante membru GAM sira asalta malu hosi parte seguransa halo kedas atuasaun, grupu artre marsiál huoi aldeia Bora Ikun, suku Tashilin hodi estraga komunidade nia sasán hanesan motorizada, uma no seluk tan
“Iha tempu ne’eba, ha’u hanesan komandante munisípiu lidera ekipa hodi atua kedas situasaun, nune’e suspeitu sira-ne’e ita identifika ona hamutuk suspeitu na’in-22, nune’e polísia kontinua buka suspeitu sira seluk,” nia hateten.
Ho nune’e kamandante mós husu ba suspeitu na’in-22 atu kopera ho parte judisiál, bainhira suspeitu sira la koopera ne’ebé ohin tama ona ba loron tolu (3), PNTL mós koordena ona ho Ministériu Públika hasai notifikasaun atu halo kaptusaun ba autór sira.
Tanba, asaun ne’ebé membru GAM sira halo nu’udar asaun brutalizmu no krime, entaun ema hotu tenke moris iha lei nia okos, atu nune’e polísia submete prosesu hotu ba Ministériu Públiku hanesan na’in ba prosesu judisiál.
Bazea PNTL halo identifikasaun, membru Grupu Arte Marsiál Setia Hati Terate (GAM PSHT) ne’ebé asalta komunidade iha suku Tashilin ho grupu ne’ebé organizadu, tanba ema na’in-ida orienta sira hodi halo asaltu, nune’e entre na’in -22 ne’e, na’in-ida halo ona kapturasaun no Ministériu Públika aplika ona Termu Indentidade Rezidensia (TIR) hodi hein mandadu kapturasaun.
Maske membru GAM asaltu malu iha suku Tashilin, hosi PNTL rasik seidauk identifika motivu hosi membru GAM sira asalta malu tanba sei iha prosesu investigasaun no foin halo identifikasaun, hafoin autór no suspeitu entrega aan, nune’e bele hatene motivu hosi asalta malu.
Suspeita na’in-22 seidauk entrega, nune’e Komandu PNTL munisípiu Covalima mós estabelese postu polísia permanente iha suku Tashilin hodi garante seguransa ba komunidade atu destaka membru PNTL na’in-hitu (7).
Jornalista : Celestina Teles
Editór : Cancio Ximenes
