Komandu PNTL simu ona kazu ema tiru joven ida iha Covalima
DILI, 31 maiu 2023 (TATOLI) – Komandante Jerál PNTL, Komisáriu Jerál Polísia, Henrique da Costa, simu ona kazu ne’ebé ema deskoñesidu tiru joven ida iha Postu Administrativu Fatumea Munisípiu Covalima.
“Horseik dader ita hetan duni relatóriu ida hosi Komandante PNTL Munisípiu Covalima, katak iha sidadaun Covalima nian ida, iha Postu Administrativu Fatumean, bainhira ba toos, nia haree animál mak hetan tiru ho kilat anin, iha toos. Maibé ema hirak ne’e deskonfia dehan ema sira ne’e la’os hosi parte Timor ninian”, Komisáriu Jerál Polísia, Henrique da Costa ba jornalista sira iha Komandu Jerál PNTL Caicoli, kuarta ne’e.
Nia dehan, ho kazu ida ne’e, Komandu PNTL orienta ona Unidade Patrollamentu Fronteira (UPF) no Komandu PNTL Muninsipiu Covalima, atu halo vijilánsia iha fronteira.
“Entaun ita orienta ona ita-nia UPF Komandu PNTL Covalima atu bele halo movimentu no Komandu Munisípiu Covalima mós kontinua prosesa ida ne’e”, Komisáriu Jerál Polísia, Henrique da Costa afirma.
Komandante Jerál PNTL hateten durante seguransa iha fronteira sempre iha problema hanesan iha Postu Administrativa Fatumea liga kedan ho fronteira terrestre ne’ebé besik liu Indonézia.
“Ita haree fronteira ne’ebá ne’e, nia rai loloos de’it ema sira hela sorin dala ruma sira fetosan no umane ka maun alin ida nee mak sai hanesan obstákulu ida, maibé ita nafatin orienta ita-nia seguransa sira iha fronteira atu asegura iha ne’ebá. Ita prepara ita-nia efetivu atu ajuda apoia Komandu PNTL Munisípiu Covalima hodi kontrola ita-nia fronteira”, nia informa.
Nia mós halo esforsu hodi kontatu adidu seguransa Indonézia iha Díli hodi informa problema ne’e ba nia atu hatene, nune’e bele evita problema sira ne’e iha futuru.
“Situasaun sira hanesan ne’e, ita komunika ho ita-nia ofisiál ligasaun hodi koalia ho adidu seguransa nia iha ne’e hodi nia mós hatene, nia informa parte seguransa sira iha ne’ebá”, nia dehan.
Jornalista: Natalino Costa
Editór : Zezito Silva
