iklan

HEADLINE, SAÚDE

MS fó konsulta espesiál ba veteranu 301 iha Lautem

MS fó konsulta espesiál ba veteranu 301 iha Lautem

Foto facebook

DILI, 31 maiu 2023 (TATOLI) – Ministériu Saúde (MS) liuhosi Diresaun Nasionál Apoiu Servisu Ospitalár koordena servisu hamutuk ho Ministériu Asuntu Kombatente Libertasaun Nasionál (MACLN) atu fó  atendimentu médika espesializada ba 310 Veteranu no Antigu Kombatente Libertasaun Nasionál iha Munisípiu Lautem.

“Ita-nia médiku espesialista sira deteta no konsulta ba ita-nia veteranu sira ho problema oinoin hamutuk 310 iha Lautem”, Xefe Departamentu Apoiu no Koordenasaun Servisu Espesializadu iha Ministériu Saúde Nilton da Cruz, hateten iha komunikadu imprensa ne’ebé TATOLI asesu, ohin.

Nia dehan, husi númeru ne’e médiku espesialista sira deteta moras sira hanesan, moras tensaun aas, COPD ka Moras Obstrusaun Pulmaun Króniku hanesan asma bronkiál, tuberkuloze ativu, Acute Back Pain, gastritis ka moras estomug, moras tilun no kapasidade auditivu atu rona menus, infesaun iha tilun no garganta, problema matan no katarata, problema ruin inklui mós bala musan, lipoma, kista iha ovariu, moras kulit sira no mós pruritus ka urtikaria tanba alerjia ba hahan.

“Iha konsulta ne’e, médiku espesialista sira hala’o tratamentu imediata ba pasiente veteranu sira ne’ebé ho kondisaun moras la komplikadu no fahe mós oklu gratituita no ba sira ne’ebé ho moras komplikadu no presiza hala’o operasaun, ekipa médika refere mai Unidade Saúde Veteranu iha HNGV hodi bele fó tratamentu ne’ebé espesializadu liu”, nia afirma.

Nia esplika, ida ne’ebé labele halo intervensaun ka operasaun iha Lautem, hanesan katarata, entaun espesialista refere mai USV, hodi re-enkamiña ba HNGV atu bele halo intervensaun.

Atividade Outreach médika espesializada ne’ebé organiza husi departamentu apoiu no koordenasaun servisu espesializadu, hamutuk ho médiku espesialista sira husi Hospitál Nasionál Guido Valadares (HNGV) no ekipa médika Xineza halao konsluta iha Lautem ho objetivu atu dignifika veteran sira nia sakrifisiu, garante atendimentu saúde ba Veteranu no Antigu Kombatente Libertasaun Nasionál.

Atividade ne’e hala’o iha Sentru Saúde Internamentu Lautem iha loron 27 maiu 2023, ne’ebe hetan atendimentu saúde sekundáriu husi médiku espesialista Kardiolojia, Oftalmolojia, Otorinolaringolojia no Audiometria, Medisina Interna, Ortopedia, Fizioterapia no Akupuntura, Dermatolojia, Jinekobstetrisia, Urolojia, Sirurjia Jerál,  no Pediatria husi HNGV no ekipa médika Xineza  ne’ebé suporta ho ekipamentu EKG, Audiometria, USG portable no Raiu X.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!