COVALIMA, SEGURANSA

PNTL Covalima rekoñese grupu deskoñesidu halo pasa revista iha auto estrada

PNTL Covalima rekoñese grupu deskoñesidu halo pasa revista iha auto estrada

Komandante PNTL Munisípiu Covalima, Superintendente Basílio de Jesus. Imajen Tatoli/Celestina Teles.

COVALIMA, 31 maiu 2023 (TATOLI)–Komandante PNTL munisípiu Covalima, Superintendente Polísia Basilio de Jesus, rekoñese grupu deskoñesidu sempre impede movimentu transporte públiku liuhosi auto estrada entre suku Tashilin ho Galitas, postu administrativu Zumalai, munisípiu Covalima.

Komandante Polísia Nasional Timor-Leste (PNTL) Munisipiu Covalima, kuarte ne’e, akompañadu hosi Batallaun Ordem Públika (BOP) tun ba terrenu haree fatin Grupu deskoñesidu asaltu sidadaun sira viajen ho transporte públiku liuhosi auto estrada parte entre suku Tashilin ho Galitas.

“Loos duni, fatin ne’e grupu deskoñesidu balun kuaze na’in-lima (5) to’o na’in-10, ita bele dehan loroloron akontese iha ne’e. La signifika polísia la halo servisu hodi halo patrullamentu durante oras 24, maibé situasaun ne’e akontese hafoin polísia patrulila liu tiha minutu 30, ita rona mosu ona,” Superintendente Polísia Basilio de Jesus hateten ba jornalista sira, iha auto estrada Zumalai, kuarta ne’e.

Grupu organizadu halo pasa revista ba sidadaun sira ne’ebé vaijen hosi Suai ba Dili no hosi Dili mai Suai, distánsia kilometru 30 to’o 31, tanba bazeia ba faktu ne’ebé hatudu iha vítima no iha  video hatudu.

“Grupu sira halo pasa revista maibé ita la halo kapturasaun ba ema sira-ne’e to’o ohin loron, nune’e halo komunidade pániku no tauk ba sidadaun sira-ne’ebé atu halo movimentu vaijen hosi Dili mai Covalima no hosi Covalima ba Dili,” nia dehan.

Maske grupu balun halo pasa revista iha parte auto estrada, maibé hanesan komadante PNTL garante situasaun iha munisípiu Covalima hakmatek tanba sidadaun balun la’o grupu organizadu, nune’e atu labele jeneraliza situasaun iha Covalima.

Grupu organizadu sira-ne’ebé impede sidadaun ho trasporte públika nia movimentu hahú iha oras 09h00 dadeer to’o 12h00 meudia no parte lorokoraik hahú iha 15h00 to’o 20h00 kalan, sempre akontese hodi hamosu pergunta atu ba ne’ebé, imi mai hosi PSHT no mós hosi sigaru no osan hafoin halai lakon.

“Hafoin komandu PNTL simu informasaun hosi vítima, bainhira PNTL to’o iha fatin grupu sira ne’e laiha ona fatin maibé situasaun jerál la sai ameasa boot ba movimentu no ba Covalima. Ita sei la husik ida-ne’e,” nia dehan.

Grupu sira-ne’e organizadu, komandu PNTL munisípiu reforsa hosi Unidade espesiál (BOP) halo operasaun ba fatin ne’ebé deskonfia, tanba iha auto estrada atu ba aldeia Galitas suku Tashilin kuaze kilometru rua, mai iha aldeia Pelet kilometru ida-resin no mos aldeia Kareta Mate kuaze kilometeu tolu (3).

Ho nune’e, nia dehan, PNTL kontinua sei buka tuir grupu organizadu sira-ne’ebé imperede movimentu sidadaun sira viajen liuhosi auto Estrada, nune’e PNTL halo patrollamentu vizibilidade husu ba komidade atu deskobre situasaun refere.

“Ha’u dehan ba komunidade sira polísia mak sai autór ba seguransa iha Covalima, komunidade hotu sai na’in ba seguransa. Se komunidade koorpera ho polísia entaun komunidade rasik deskobre tanba labrik ne’ebé envolve iha grupu balun ho idade menór balun foin tinan 18 to’o 25 signifika hela ho inan-aman,” nia dehan.

Ho situasaun hirak ne’e, Komandante orienta ho membru sira halo patrullamentu, tama sai bairru hodi buka informasaun hodi hatudu filmajen sira husu komunidade koñese, maibé to’o ohin loron komunidade seidauk deskobre labarik refere.

PNTL seiduak identifika motivu hosi grupu deskoñesidu ne’ebé impede movimentu transporte públiku liuhosi auto estrada tanba sira laiha servisu ka oinsá.

PNTL akompaña hosi BOP sei halo patrollamentu rutina tuku 14h00 lorokoraik hodi garante seguransa ba sidadaun sira-ne’ebé hala’o movimentu ho transporte públiku liuhosi auto estrada postu administrativu Zumalai.

Jornalista : Celestina Teles

Editór      : Cancio Ximenes

iklan
iklan

Leave a Reply

iklan
error: Content is protected !!