VIQUEQUE, 31 maiu 2023 (TATOLI)—Vise-Ministru Justisa, José Edmundo Caetano ‘Saka Timor’ husu ba Governu foun rezolve problema menus transporte iha Servisu Terra no Propriedade munisípiu Viqueque, nune’e funsionáriu sira bele uza halo servisu.
“Durante ne’e ami haree no relatóriu sira-ne’ebé mai hosi Diresaun Terra sira hosi munisípiu hato’o difikuldade ba ami katak oras ne’e sira laiha transporte. Ida-ne’e maka sai difikulta ba sira hodi hala’o sira-nia knaar ba levantamentu dadus kadastrál hodi tun sukat rai. Nune’e, ha’u espera Governu foun mai ne’e bele tau orsamentu hodi rezolve problema transporte,” governante ne’e informa ba Agência Tatol iha Diresaun Terras iha Beloi, Viqueque, kuarta ne’e.
Notísia relevante: DNTP Covalima arrekada reseita rihun $23 ba kofre Estadu
Antes ne’e, Diretór Terra no Propriedade munisípiu Viqueque, Apolinário Ximenes hato’o preokupasaun kona-ba transporte ne’ebé sempre difikulta sira-nia servisu, liu-liu iha área rurál sira.
“Dezafiu ne’ebé durante ne’e ami hasoru maka transporte tanba iha área sira-ne’ebé dook, ami labele ho motorizada mak asesu. Tanba ita haree kondisaun dalan iha Viqueque ne’e barak maka kondisaun grave. Tanba ne’e uma Estadu barak ne’ebé iha área rurál maibé ami seidauk ba halo kontratu ho okupante sira,” nia hato’o.
Nia dehan, Servisu Terra no Propriedade presiza transporte hodi reforsa servisu iha munisípiu Viqueque tanba propriedade Estadu iha área rurál barak maka seidauk halo kontratu no servisu sira seluk.
Daudaun ne’e Servisu Terra no Propriedade munisípiu Viqueque iha funsionariu na‘in-10 hodi fó atendimentu ba komunidade.
Jornalista : Vitorino Lopes da Costa
Editora : Julia Chatarina
