DILI, 31 maiu 2023 (TATOLI) – Médiku Jerál Klínika Bairo Pite, Kewen Robert Lu Pereira, dehan sinál sintoma kankru ran mak oin halai, isin manas no kabun bubu.
“Sinál sintoma husi kankru ran ne’e dalabarak pasiente sira mai halo tratamentu saúde ho oin halai, isin manas depois kabun bubu no halo aten sira bubu hotu entaun pasiente sira ne’e ita suspeita ba kankru raan”, Kewen Robert lu Pereira informa ba TATOLI iha edifísiu TATOLI.IP ohin.
Nia hateten, kankru ran ne’e akontese liubá ema boot sira liuliu mane tanba kankru ran ne’e afeta husi aihan kímiku no mós mai husi jenétiku sira.
“Moras kankru ran ne’e durante ita halo tartamentu iha Klínika Bairo Pite depois ita haree ba grave ona ita halo transferénsia ba Hosptál Nasionál Guido Valadares (HNGV) atu espesilista sira kontinua halo intervensaun”, nia afirma.
Nia esplika, pasiente kankru ran ne’e la’os mai husi Munisípiu Dili dei’t, maibé husi munisípiu hotu mai halo tratamentu iha klínika Bairo Pite.
“Dalabarak ita lakon kontatu ho pasiente sira tanba sira barak hela iha munisípiu depois sira atu mai simu aimoruk ba kankru ran laiha osan atu selu transporte atu mai Dili, entaun ida ne’e problema tebes hodi afeta ba sira nia saúde maibé ami planu ona katak aimoruk ba leokimia ida ne’e ami halo distribuisaun ba fasilidade saúde sira bainhira pasiente sira presiza bele ba fasilidade saúde ne’ebé mak besik iha sira nia hela fatin”, nia subliña.
Nia relata, kazu kankru ran ne’ebé mak Klinika Bairo Pite rejista husi tinan 2018 mai to’o agora hamutuk 36, husi ne’e balun lakon vida no daudaun ne’e kazu ne’ebé sei iha hamutuk 19.
Kona-ba ekipamentu no medikamentu KBP sufisiente hodi halo tratamentu ba pasiente sira ne’ebé mak sofre ho moras kankru ran ida ne’e.
“Atu prevene moras ida ne’e mak nafatin halo ezersísiu lorloron no han aiha ne’ebé mak saudável ba ita”, nia konklui.
Jornalista : Felicidade Ximenes
Editór : Zezito Silva
