DILI, 01 juñu 2023 (TATOLI)—Prezidente Komisaun Nasionál Kontra Traballu Infantil (CNCTI, sigla portugés), Aniceto Leto Soro hateten, Timor-Leste sei selebra loron mundiál labarik iha Rejiaun Adminitrativu Espesiál Oé-Cusse Ambeno (RAEOA).
Tuir planu, loron mundiál labarik ne’ebé mundu tomak selebra iha kada 01 juñu ne’e, CNCTI hamutuk ho Institutu Defeza ba Diretu Labarik (INDDICA, sigla portugés) sei selebra iha loron 12 juñu 2023 ho tema “Justisa Sosiál ba Ema Hotu no Hapara Traballu Infantil”.
“Ami prepara hela hodi halo komemorasaun loron mundiál ne’e sei selebra iha RAEOA, iha dia 12 juñu, ho nia “Justisa sosiál ba ema hotu no hapara traballu infatil” maibé ita hahú iha dia 10 juñu hodi realiza atividade sira-ne’ebé mak liga ho labarik nian. Maibé agora ita fokus ba trabalho FONTIL,” Leto hateten ba Tatoli, iha nia knar fatin Hudi-Laran, Dili, kuarta (31 maiu 2023) ne’e.
Leto Soro hateten, tema ida-ne’e tema internasionál no tema ne’ebé mak organizasaun internasionál aprova no iha kompleksu internasionál.
“Ho razaun ne’e ita haree katak ema barak la hetan justisa, liu-liu ba labarik sira-ne’ebé servisu, ladún tau atensaun, ladún tau preokupasasaun ba parte hotu-hotu liuliu iha parte justisa nian, tanba justisa ne’e tenke aplika ba ema hotu,” nia dehan.
Tuir dadus 2006 nian, labarik maiória servisu ne’e iha Dili, tuir fali Aileu, Ermera no Lautém, no kuaze labarik sira servisu 40% iha munisipiu sira, iha munisipiu seluk ne’e menus hosi 20%, hotu-hotu 30% ba leten, hahú hosi 37%-45% ne’e hahú hosi Aileu iha 45%, Ermera iha 37%, Lautem35% no bootliu mak Dili 40%.
Jornalista : Osória Marques
Editór : Cancio Ximenes
