DILI, 01 juñu 2023 (TATOLI)—Prezidente Komisaun Nasionál Kontra Traballu Infantil (CNCTI-sigla portugés), Aniceto Leto Soro, husu Governu investe osan iha ensinu rekorrente iha Timor-Leste.
Notísia Relevante: CNCTI submete ona planu asaun nasionál traballu infantil ba MKAE
“Tau osan ho montante boot iha eskola rekorrente no mós ninia fasilidade tenke hanesan ho eskola ensinu sekundáriu jerál sira seluk. Profesór tenke iha kualifikadu, nune’e bainhira estudante ida sai hosi ensinu rekorrente no ensinu sekundáriu jerál tenke iha matanek no abilidade ne’e hanesan,” nia dehan ba Aência Tatoli liuhosu programa Entrevista Eskluziva iha studio Faról, Travesa Sergio Vieira de Mello, Dili, kinta ne’e.
Ho nune’e, nia dehan, bainhira ba iha kampu traballu ne’e ema uza hanesan hodi labele haree de’it mak prodús hosi ensinu sekundáriu jerál, maibé ensinu rekoerente mós tenke envolve, tanba ida-ne’e husu Governu mai ne’e tenke haree asuntu refere hodi tau importánsia hanesan.
“Ita hakarak ne’e tenke fasilidade ne’ebé mak hanesan, nune’e bele iha intelektuál no abilidade ne’ebé iha hodi bele kompete iha terrenu,” nia dehan.
Tanba ne’e, husu ba inan-aman sira atu tau importánsia ba oan sira tanba futuru ne’e iha labarik sira-nia liman, nune’e tenke haruka oan sira asesu ba eskola hodi hetan matenek no loron ikusbele tulun família, nasaun no rai ida-ne’e.
Atu atinje mehi ida-ne’e, nia husu Estadu liuliu órgaun kompetente atu fó asisténsia no atendimentu ne’ebé mak justu no labele halo diskriminasaun ba labarik sira-ne’ebé mak iha interrese atu aprende.
“Ami husu atu tau prioridade no konsidera sira-ne’ebé ekonómia limitadu no moris vulnerável ne’e,” nia hateten.
CNCTI husu mós ba instituisaun xave sira mak tenke halo monitorizasaun, kontrolu no halo diálogu ho labarik sira iha baze, karik ajuda fasilita informasaun ruma kona-ba regra, lei sira no tenke buka identifika labarik sira problema nune’e relata tuir problema ne’ebé mak labarik infrenta iha terenu.
Notísia Relevante: Hahú tinan 2015-2021, MEJD rejista estudante ensinu rekorrente 1.145
Jornalista : Osória Marques
EDitór : Cancio Ximenes
