DILI, 01 juñu 2023 (TATOLI)—Prezidente Komisaun Nasionál Kontra Traballu Infantil (CNCTI-sigla portugés), Aniceto Leto Soro, hateten CNCTI rekomenda ba Prezidente Autoridade Rejiaun Administrativa Espesiál Oé-Cusse Ambeno (RAEOA) hamatan ba família ne’ebé vulnerável liu, nune’e labarik Oé-Cusse-oan sira labele mai buka moris iha kapitál Dili.
Notísia Relevante: Labarik Sira hosi RAEOA 40% Hala’o Atividade Faan Sasán iha Dili
“Rekomenda ba autoridade RAEOA atu haree liu ba família sira-ne’ebé ki’ak, ami hateten atu atende no fó asisténsia ba família ki’ak nune’e labarik Oé-Cusse-oan sira labele mai Dili. Sira mai Dili ne’e tanba ekonómia família fraku,” nia dehan ba Aência Tatoli liuhosu programa Entrevista Eskluziva iha studio Faról, Travesa Sergio Vieira de Mello, Dili, kinta ne’e.
Tanba, tuir nia, labarik sira hosi Oé-Cusse ne’ebé buka moris iha ha Dili ne’e, sira la’ós faan manu-tolun de’it maibé iha labarik balun ne’ebé mak halo servisu loro-loron hanesan suru rai-henek iha mota laran.
“Ita haree família tomak mai hotu halo servisu iha ne’e,” Leto Soro hateten.
Nia dehan, tanba meiu ekonómika iha RAEOA mak susar, tanba ne’e mak RAEOA tenke haluan tan atendimentu no kria zona ekonómika iha ne’ebá, nune’e kria ekonómia ne’ebé di’ak atu labarik sira labele mai iha ne’e.
“Tanba ne’e, presiza halo identifikasaun ba família ne’ebé kiak nune’e ajuda hodi labele mai iha Dili. Iha komemorasaun loron mundiá labarik, ita foti tema ‘Justisa Sosiál hodi hapara traballu infantil’. Ita foti tema ne’e, nune’e ema hotu haree labarik ho justu maibé ita tau prioridade ba ema ki’ak sira. Bainhira RAEOA haluan atendimentu no kria kondisaun ba sira, fiar katak sira sei la mai,” nia dehan.
Tuir dadus, labarik sira-ne’ebé mak hala’o traballu infantil iha Dili ne’e, 40% labarik sira hosi REAOA mak buka moris iha Dili.
Tuir peskiza ne’ebé mak CNCTI halo ne’e, labarik halo traballu infantil ne’ebé rejistu barak mak Aileu iha 45%, Dili 40%, tuir mai Ermera 37% no Lautém iha 35%, no munisípiu seluk menus hosi 20%. REAOA ne’e rasik menus hosi 20% tanba sira mai hotu Dili, nune’e hodi aumenta to’o 40% ne’e.
Jornalista : Osória Marques
Editór : Cancio Ximenes
