iklan

COVALIMA, SEGURANSA

Deskonfia sidadaun Indonézia uza kilat manu tiru sidadaun Timor iha Fatumea

Deskonfia sidadaun Indonézia uza kilat manu tiru sidadaun Timor iha Fatumea

Mapa postu administrative Fatumea-Covalima. Imajen/Espesiál.

COVALIMA, 01 juñu 2023 (TATOLI)—Xefe Suku Fatumea, Julio da Costa, hateten deskonfia sidadaun Indonézia uza kilat manu tiru kanek sidadaun timoroan na’in-ida, tersa 30 maiu 2023, hosi aldeia Rai-Oan, suku Fatumea, postu administrativu Fatumea, munisípiu Covalima.

“Ita-nia sidadaun timoroan ida, deskonfia sidadaun Indonézia uza kilat manu tiru kanek iha parte kelen. Vítima mai hosi suku Fatumea, aldeia Rai-Oan, postu administrativu Fatumea, munisípiu Covalima bainhira ba haree nia karau,” Xefe Fatumea, Julio da Costa Nunes, hateten ba Agência Tatoli liuhosi telefone, kinta-ne’e.

Sidadaun timoraon na’in-ida ne’e hetan tiru deskonfia hosi sidadaun indonézia ida iha área Lo’o-Betun tuku 12h00  bainhira buka hela nia karau iha área territóriu Timor.

Hafoin hetan tiru iha loron tersa 30 maiu 2023, sidadaun hosi postu administrativu Fatumea ne’e ambulánsia tula kedas mai iha óspital referál Suai hodi halo tratamentunu intensivu iha kuarta (31 maiu 2023) ne’e.

Ho akontesimentu ne’e, líder komunitáriu husu ba sidadaun iha suku Fatumea, bainhira ba haree karau ne’e tenke atensaun nakaas nune’e labele repete tan, tanba iha sidadaun Indonézia balun buka sira-nia karau to’o mai iha área júridiku Timor nian.

Komandante PNTL munisípiu Covalima, Superintendente Polísia Basílio de Jesus, hateten sidadaun ne’ebé deskonfia hetan hosi sidadaun Indonézia bainhira sidadaun refera ba haree karau iha área Timor.

“Ita-nia katuas-ida hetan tiru bainhira ba haree karau iha ita-nia territóriu Timor, derrepende  dekonfia sidadaun hosi indonézia lori kilat mamu tiru katuas ida nia kelen, kanek ne’ebé nia entrega aan iha polísia ita lori ba óspitál,” nia relata.

Sidadaun Timor ne’ebé hetan tiru ne’ e hosi postu administrativu Fatumea, munisípiu Covalima, bainhira haree hela nia karau iha área territóriu Timor no hafoin haetan tiru, suspeitu ne’ebé deskonfia sidadaun Indonézia ne’e halai tama kedas ba  Indonézia.

“Ha’u hanoin buat-ida ne’e la’ós foin akontese ba dahuluk, maibé akontese ba daruak ona. Tanba, iha tinan tolu ba kotuk mós akontese iha Fatumea motivu hanesan, uza kilat manu tiru ita-nia komunidade maibé  iha momentu ne’e lahetan kanek,” nia dehan.

Tanba ne’e, Komandante PNTLne’e husu ba órgaun kompetente liuhosi Ministériu Interiór koordena ho embaixada Indonézia iha Timor-Leste hodi eduka nia populasaun ne’ebé hela iha liña fronteira lori kro’at mai iha área Timor.

“Sidadaun sira lori kro’at tama ita-nia territóriu no uza kilat manu tiru ita-nia sidadaun, ida-ne’e nia halo krime iha ita-nia territóriu Timor-Leste,” nia dehan.

Ho akontesesimentu refere, hanesan Komandante Munisípiu Covalima ko’alia kona-ba liña fronteira destaka ona Unidade Patrollamentu Fronteira (UPF) iha fronteira hahú hosi postu Tilomar, Fatumea, Fatululik no Maucatar ne’ebé área júridiku Covalima.

Maske destaka ona polísia Fronteira, maibé distánsia entre postu ida ba postu seluk dook malu, balun kilometru 20 to’o kilometru 30, entaun distánsia fó vantajen tebes ba sidadaun Indonézia tanba bele ultra pasa mai Timor-Leste.

“Ha’u servisu haree liu ba eskuadra maibé la taka dalan ita mós fó apoiu haree kondisaun asesu estrada dook hosi liña fronteira, hanesan komandante nafatin buka meiu ho rekursu ne’ebé iha eskuadra PNTL Fatumea to’o Fohorem, oinsá mak bele fó apoiu iha fronteira hodi minimiza no kontrola sidadaun ultra pasa liuhosi dalan illegal,” nia hateten.

Bazeia dadus, Ajente PNTL ne’ebé destaka iha postu administrativu Fatumea na’in-hitu (7), Fohorem nain-ualu (8) no Fatululik nainn-neen (6), maibé kontinua fó orientasaun  atu fó apoiu UPF halo movimentu iha liña fronteira nune’e ilegál sira labele tama mai iha territóriu Timor.

Jornalista : Celestina Teles

Editór      : Cancio Ximenes

iklan
iklan

Leave a Reply

iklan
error: Content is protected !!