DILI, 01 juñu 2023 (TATOLI)—Diretór Eskola Báziku Sentrál (EBC, sigla portugés), Manleuana, Cosme dos Santos Freitas, hateten, daudaun ne’e parte eskola enfrenta problema falta bee-moos.
“Ami iha difikuldade falta bee-moos, iha ne’e komunidade balun mak loron-loron oferese sira-nia bee-moos mai ami hodi uza ba nesesidade eskola,” Diretór informa ba Agência Tatoli iha nia knaa fatin, kinta ne’e.
Antes ne’e, parte eskola kontratu ona empreza lokál Wasbila Keny, Unipessoal Lda, iha setembru 2021 hodi fura bee-moos, liu fulan balun bee sai duni no eskola konsege uza maibé bee-moos sai seidauk uza to’o tinan bee maran, bainhira kontaktu empreza abandona serbisu.
“Ha’u tenta kontaktu empreza na’in atu mai haree fali bee ne’e tanba daudaun bee la sai, maibé to’o agora seidauk mai. Tuir kontratu bainhira bee ne’e sai di’ak loos ona eskola sei selu osan $4.000, entaun durante ne’e parte eskola selu ona $3.000 resin, falta de’it mak $250, tanba osan $250 ne’e osan garantia nian, ne’ebé bainhira bee sai loos ona sira entrega ofisiál ona mak foin selu hotu,” nia akresenta.
Notísia relevante : EBC Boboloa husu autoridade komunitáriu apoia kanaliza bee-moos ba eskola
Nune’e, parte eskola husu ba empreza na’in hodi haree filafali hodi halo manutesaun bee tanba eskola presiza bee-moos hodi tein ba merenda eskolár nia.
Relasiona ho situasaun ne’e, Jerente empreza Wasbila Keny, Unipessoal Lda, Amélia da Costa, konfirma, sira-nia parte la abandona serbisu no daudaun ne’e sira seidauk bele ba haree fali bee tanba traballadór ne’ebé serbisu fura bee balun moras entaun seidauk bele kontinua.
“Fura bee ne’e serbisu todan entaun traballadór tenke kompletu mak foin bele serbisu, maibé ha’u kontaktu ona traballadór sira, nune’e semana oin sira ne’e ami bele ba kontinua serbisu tanba bee refere antes ne’e sai eskola uza tiha maibé foin mak la sai fali, ida-ne’e natureza iha rai okos ita lebele hatene,” nia tenik.
Maski nune’e, Jerente empreza dehan, hanesan empreza ne’ebé kaer projetu refere sei garante no responsabiza serbisu to’o ramata.
Jornalista : Arminda Fonseca
Editora : Julia Chatarina
