MAP fó formasaun tékniku floresta ba guarda floresta iha Covalima
COVALIMA, 01 juñu 2023 (TATOLI)—Ministériu Agrikultura no Peska (MAP) liuhosi Gestão das Florestas Bacias Hidrográficas e Área Mangais (GFBHAM) fó formasaun tékniku floresta ba guarda floresta iha munisípiu Covalima.
“Ami mai fó kapasitasaun ba korpu guarda floresta, oinsá tun iha baze bele halo intensaun konaba tékniku floresta, oinsá hanorin komunidade atu bele implementa sistema agro floresta iha toos,” Xefe Departamentu Guarda Gloresta Estensaun, João Dasimanu dos Reis, hateten ba jornalista sira iha salaun floresta Covalima, Kampung Baru, kinta ne’e.
Bazea ba baze lei rejime jerál floresta ne’ebé nune’e sira hala’o sira-nia bele halo esplikasaun ba komunidade sira durante ne’e ko’alia katak floresta laiha lei atu halo protesaun ba ambiente, protesaun ba animál fuik no oinsá komunidade labele tesi ai ilegál no sunu rai arbiru.
“Ho nune’e, hahú iha tinan 2021, ami aplika ona sansaun ne’ebé uza sistema hakbesik ba komunidade, atu nune’e bainhira lori ai ilegál mai halo ami kaptura no halo sira prienxe deklarasaun ba futuru labele komete tan,” nia dehan.
Maske realidade hatudu bainhira prende ai hodi fó toleránsia hodi uza sistema hakbesik ba komunidade, sira kontinua halo entaun iha fulan-janeiru tinan 2023 floresta implementa sistema bainhira floresta kaptura hodi submete kedas ba Ministériu Públiku.
Guarda floresta Covalima, Joselino do Carmo, kontente bainhira tuir formasaun nune’e bele informasaun kona-ba tékniku guarda floresta bainhira hala’o servisu iha terrenu.
“Ami sente kontente bainhira tuir formasaun ami bele iha informasaun kona-ba rejime jerál kona-ba tékniku sukat ai loron hira mak bele sai kúbliku ida atu implementa iha terrenu,” nia hateten.
Serimónia fó formasaun ba guarda floresta iha Covalima ne’e partisipa hosi korpu guarda floresta nain-28 iha munisípiu Covalima.
Jornalisra : Celestina Teles
Editór : Cancio Ximenes
