MALIANA, 01 juñu 2023 (TATOLI) – Ministru Obra Públika, Abel Pires, hateten daudaun ne’e tékniku sira konklui ona prosesu verifikasaun dadus estrada urbana hosi diresaun Maliana Vila ba postu administrativu Bobonaro no postu administrativu Lolotoe, munisípiu Bobonaro.
Notísia relevante: Prezidente Repúblika ‘sasin’ ba promesa MOP hadi’a estrada Bobonaro-Lolotoe
“Estrada hosi Maliana ba Bobonaro no Lolotoe verifikasaun hotu ona, entaun oituan tán ba ona tender (konkursu públiku). Se governu ida ne’e la konsege, governu foun mai bele halo,” nia informa ba jornalista sira, iha kampu futeból Maliana, kinta ne’e.
Enkuantu kona-ba estrada urbana, Cailaco governu hetan ona kompania manan-na’in atu halo dezenu no ninia prosesu konkursu públiku bele akontese tinan ne’e iha mandatu governu dasia.
Governante ne’e hatutan, estrada parte diresaun postu administrativu Atasabe, munisípiu Ermera luta ba postu administrativu Bobonaro, munisípiu Bobonaro mós iha halo prosesu konkursu públiku.
“Ida-ne’e iha Bobonaro ita kobre kuaze postu hotu-hotu, ne’ebé ha’u hanoin kondisaun ida-ne’e mak esforsu VIII Governu halo. Agradese ba tékniku sira serbisu maka’as, ne’ebé mak agora ita iha kondisaun di’ak tebes kompara ho tinan liubá,” Ministru Abel dehan.
Enkuantu iha loron-kuarta, 31 maiu ne’e governu liuhosi reuniaun Konsellu Ministru aprova proposta hosi Ministru Obras Públika, Abel Pires, kona-ba projetu estrada urbana iha kapitál Maliana pakote I ho valór estimasaun millaun $13,6.
“Pakote ida horisehik aprova ne’e mak sei kobre bairru-bairru iha Maliana Vila, manán-na’in iha ona komapaña Indonézia ida rezultadu tender (konkursu públiku) hosi CAN (Komisaun Nasionál Aprovizionamentu),” nia katak.
Notisia relevante: Governu presiza halo intervensaun urjénsia ba estrada Galisapulu iha Bobonaro
Jornalista : Sérgio da Cruz
Editór : Evaristo Soares Martins
