iklan

EDUKASAUN, HEADLINE

UNICEF implementa ona Programa Eskola Komunitária iha Ermera no Viqueque

UNICEF implementa ona Programa Eskola Komunitária iha Ermera no Viqueque

Reprezentante UNICEF iha Timor-Leste, Bilal Aurang Zeb Durrani. Imajen Tatoli/Francisco Sony

DILI, 01 juñu 2023 (TATOLI) – Fundu Nasaun Unida ba Infánsia (UNICEF, sigla inglés) iha Timor-Leste implementa ona Programa Eskola Komunitária ba ensinu pré-eskolár sira iha Ermera no Viqueque. Programa ne’e nu’udar projetu-pilotu ida no ba futuru sei implementa mós iha territóriu.

Reprezentante UNICEF, Bilal Durrani, hatete eskola komunitária iha munisípiu rua ne’e utiliza edifísiu suku no Governu lokál nian hodi hanorin labarik sira.

Husi projetu-pilotu ida ne’e, UNICEF kria ona eskola 104 iha Ermera no Viqueque no akomoda ona labarik hamutuk rihun 3 ne’ebé sai nu’udar benefisiáriu. Labarik sira ne’ebé partisipa programa ne’e ho idade entre 3 no 5.

Tuir dadus husi UNICEF, labarik sira ne’ebé asesu ba atividade eskola komunitária foin atinje 27%. Tanba ne’e, reprezentante UNICEF husu bá Governu, liuhusi Ministériu Edukasaun atu iha ambisaun boot hodi duni meta ba planu estratéjiku nasionál katak husi 2011 to’o 2030 labarik hotu-hotu bele asesu ona edukasaun pré-eskolár iha Timor-Leste.

“Atu alkansa meta ida ne’e, UNICEF hakarak ajuda Governu Timor-Leste hodi habelar programa ida ne’e ba munisipiu hot-hotu hodi alkansa Objetivu Dezenvolvimentu Sustentavel ba edukasaun pré-eskolár iha Timor-Leste”, Bilal Durrani hatete iha Caicoli, kinta ne’e.

Dirijinte UNICEF ne’e salienta katak atu atinje ida ne’e Governu la presiza konstroi uma boboot, maibé bele uza de’it edifísiu suku sira no Governu lokál balun ne’ebé mamuk atu manorin sira bele utiliza fatin hirak ne’e hodi hala’o prosesu aprendizajen ba labarik sira. “Tanba modelu ida ne’e sei poupa Orsamentu Jerál Estadu ba harii edifísiu ba eskola iha Timor-Leste”, afirma.

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!