DILI, 02 juñu 2023 (TATOLI)–Ekipa Monitorizasaun no Fiskalizasaun Konjunta (EMFK) durante hala’o serbisu, nota katak ministériu no institusaun balun ladún kontrola utilizasaun viatura Estadu, ho nune’e pesoál balun utiliza viatura interrese privadu, maski fó sai ona regra utilizasaun.
“Hanesan meiu-dia, utilizadór lori viatura ba uma, dadeer kondutór tula iha uma, lorokraik tula fali bá uma no loron férias utiliza viatura Estadu ba asuntu privadu,” Pontu Vogál Ministériu Finansa, Cipriano Pereira, relata liuhosi konferénsia imprensa konjunta, iha edifísiu Patrimóniu Estadu, Balide, sesta ne’e.
Regra ne’ebé fó sai bazeia ba dekretu-lei númeru 80/2022 kona-ba regulamentu viatura Estadu nian, dekretu-lei númeru 6/2003, 30 abríl kona-ba Kódigu estrada, sirkulár númeru 003/GPM/111/2009 kona-ba jestaun tékniku karreta Estadu, sirkulár númeru 001/GPM/X/2012 kona-ba kontrola movimentu viatura Estadu no padraun prosedimentu operasionál ekipa monitorizasaun fiskalizasaun konjunta kompostu hosi Ministériu Finansa (MF), Inspesaun Jerál Estadu, Ministériu Transporte no Komunikasaun (MTK), Polísia Nasionál Timor-Leste (PNTL), Komisaun Antí-Korrupsaun (CAC, sigla portugés) no Komisaun Funsaun Públika (CFP, sigla portugés).
Ho nune’e, ekipa Monitorizasaun no Fiskalizasaun Konjunta kompostu hosi PNTL, CAC, CFP, Inspesaun Jerál Estadu, Diresaun Jerál Jestaun Patrimóniu Estadu Ministériu Finansa (MF-DJJPE) no Diresaun Nasionál Transporte Terrestre (DNTT), hakarak aviza ba responsável lojístika no patrimóniu iha ministériu, institusaun Estadu, servisu fundu autonóma, autoridade munisipál no administrasaun munisipál hotu atu halo kontrolu másimu ba utilizasaun viatura Estadu diáriamente iha institusaun ida-idak tuir regra no prosedimentu ne’ebé maka iha, maibé la inklui ba sira ne’ebé autorizadu ona ho lei no dekretu-lei sira.
“Husu ba responsável lojístika no patrimóniu sira atu fó hatene ba utlizadór hotu hodi kumpre avizu ne’e, karik iha utilizadór balun la kumpre, bele informa ba ekipa konjunta atu halo intervensaun imediata,” Cipriano Pereira bolu atensaun.
Notísia relevante : CAC notifika ona funsionáriu uza viatura Estadu partisipa kampaña eleitorál
EMFK sei halo monitorizasaun no intervensaun ba utilizasaun viatura Estadu iha tempu han meiu-dia, antar Jemput iha dadeer no lorokraik liuhosi atividade pasa revista no sweeping. Ekipa konjunta sei halo inspesaun direta ba mina ministériu no instituisaun Estadu sira, ne’ebé liga ba servisu lojístiku no patrimóniu ho jestaun utilizasaun viatura Estadu.
Nune’e, munisípiu 12 inklui Rejiaun Administrativa Espesiál Oé-cusse Ambeno estabelese ona EMFK ne’ebé PNTL munisípiu, DNTT no Servisu Lojístiku Patrimóniu munisípiu sei kolabora hamutuk iha nasionál atu kontrola viatura Estadu iha munisípiu no hosi nasionál to’o munisípiu.
“Ba utilizadór karreta Estadu ne’ebé mak la kumpre avizu ne’ebé fó sai, sei hetan responsabilidade administrativa, disiplinár no kriminál. Aleinde ne’e husu ba públiku atu halo kontrolu ba utilizasaun viatura Estadu la tuir regra, liuhosi hasai fotografia no vídeo hodi lansa iha rede sosiál, facebook CAC ou whatsaap EMFK ho númeru telefone 77304448, 78540197, 78678147 no 77230182 hodi bele prosesa,” nia apela.
Prosesa ona viatura Estadu 100 resin
Biban hanesan, Pontu Vogál CAC, Euclides Vidal Madeira, relata katak ekipa konjunta estabelese iha tinan 2019, ne’ebé desde tinan ne’e to’o 2023 prosesa ona kazu utilizasaun viatura Estadu tantu karreta no motorizada hamutuk 100 resin.
“Hosi númeru ne’e halo ona prosesu ein termu kriminál, haruka ba parte relevante no administrativa haruka ba CFP,” nia adianta.
Pontu Vogál CFP, Balizário Rafael Magno Pereira, akresenta, dadus ne’ebé komisaun simu hosi ekipa konjunta katak iha tinan 2019 simu kazu 22 mai hosi ministériu 22, kompostu halo apreensaun liuhosi auto stop.
Iha tinan 2020 liuhosi auto stop ekipa konjuntu halo apreensaun ba viatura Estadu hamutuk neen mai hosi instituisaun Estadu no daudaun prosesa hotu no aplika ona sansaun ba utilizadór.
Iha tinan 2022 liuhosi auto stop dala-rua ekipa konjunta halo apreensaun ba viatura 43, daudaun CFP prosesa no sei aplika sansaun disiplinár ba funsionáriu sira ne’ebé utiliza viatura.
“Aleinde aplika sansaun disiplinár no utilizadór sira selu multa ba infrasaun ne’ebé komete,” nia tenik.
Iha tinan 2023 seidauk rejista kazu ruma maski iha ona maibé CFP seidauk simu.
Jornalista : Antónia Gusmão
Editora : Julia Chatarina
