VIQUEQUE, 02 juñu 2023 (TATOLI)—Ekipa hosi Gabinete Apoiu Sosiedade Sivíl (GASC, sigla portugés) iha Gabinete Primeiru-Ministru (GPM) akompaña hosi autoridade no abitante lokál, sesta ne’e inaugura igreja Betesda Naedala iha suku Afaloikai, postu administrativu Uatulari, munisípiu Viqueque.
Koordenadór GASC, Filipe da Costa, hateten, atu sai sidadaun di’ak presiza sai uluk relijiozu di’ak, tanba ne’e presiza kria fatin hodi halo devosaun orasaun.
“Ita fó apoiu ba relijiozu sira iha Timor, atu nune’e bele prepara ita-nia ema sai relijozu ida di’ak. Tanba Timor ninia ukun-an mai hosi fiar maka lori ita ba ukun rasik-an,” Koordenadór dehan durante serimónia inaugurasaun igreja.
Notísia relevante : Igreja protestante preokupa prosesu tratamentu sertidaun kazamentu-RDTL
GASC antes ne’e selebra akordu Igreja Protestante Timor-Leste (IPTL) hodi halo konstrusaun ba igreja foun Kongregasaun Betesda Naedala, inklui instalasaun eletrisidade no halo morru, nune’e hosi parte gabinete fó apoiu fundu subvensaun publika hosi orsamentu 2021 ho montante $167.786,36, ne’ebé hatuur fatuk dahuluk iha loron 29 outubru 2021.
Iha fatin hanesan, Moderadór Sínodo IPTL, Domingos Alves, agradese ba VIII Governu ne’ebé fó apoia orsamentu hodi harii igreja ba sarani IPTL iha suku Afaloikai no ba autoridade Uatulari tomak.
“Funsaun uma kreda atu hasa’e orasaun, haklaken espirituál no hametin domin ba Maromak,” nia akresenta.
Iha fatin hanesan, Administradór postu Uatulari, Manuel do Rosário, husu sarani prostante Uatulari labele husik mamuk igreja.
“Ha’u husu ba sarani sira, ita harii igreja hodi hasae ita-nia sakrifísiu ba Na’i Maromak hodi fó dame no grasa ba ita atu hadomi malu. Dala barak kuandu inaugura ema nakonu, maibé domingu ema laiha no igreja balun animál maka iha laran fali,” nia tenik.
Igreja Betesda Naedala harii hosi empreza Bee-moris.
Daudaun igreja protestante iha territóriu Timor laran tomak hamutuk 76.
Jornalista : Vitorino Lopes da Costa
Editora : Julia Chatarina
