Governu fó pose ba diretór munisípal 16 iha Covalima
COVALIMA, 02 juñu 2023 (TATOLI)–Governu liuhosi Vise Ministru Administrasaun Estatál (MAE), Lino de Jesus Torrezão, akompañadu hosi Administradór Munisípiu Covalima, Francisco de Andrade, sesta ne’e, fó pose ba diretór munisipál na’in-16 iha Covalima.
“Ha’u fó mensajen ba diretór foun ne’ebé simu pose hodi kompleta estrutura munisípiu Covalima ne’ebé hatuur kompeténsia iha dekretu-lei númeru 3/2016 presiza ema atu hala’o kompeténsia atu hala’o loloos imi-nia kna’ar ne’ebé konsagra ona iha dekretu-lei,” Lino de Jesus Torrezão hato’o iha nia dirkursu bainhira fó pose ba diretór munisipál, iha salaun Administrasaun Munisípiu Covalima.
Governante ne’e dehan, assume kargu diretór laiha servisu foun ne’ebé ita-boot sira atu halo maibé atu hatutan de’it nune’e ami atu konsolida fali kompeténsia hatuur ona iha dekretu-lei refere.
Tuir loloos prosesu atu forma governasuan foun labele hala’o prosesu foun, maibé hala’o serimónia fó pose molok ne’e prosesu hala’o ona.
Maske forma Governu foun la signifika atu troka labele tanba tuir prosesu rekrutamentu pór méritu bainhira Governu foun atu troka tenke haree la obedese pontu sira hanesan avaliasaun dezempeñu, obodese, hakruuk ba ierarkia anba ko’alia burokrásia la’ós demokrásia
Administradór Munisípiu Covalima, Francisco de Andrade hateten, asume kargu diretór la’ó buka oportunidade asume kargu maibé hanesan mós responzabilidade tanba ita-boot sira mak sai inisiadór nune’e labele repete erru ne’ebé molok ne’e akontese.
Nia dehan, erru ne’ebé antes ne’e akontese ona sai hanesan referénsia, nune’e ba oin atu hakat di’ak-liu tanba Covalima hein hela.
Iha nia diskursu, autoridade Covalima mós esplika, iha nia mandatu realiza ona serimónia fó pose ba dala haat ona hanesan fó pose ba administradór postu administrativu sira, xefe departamentu na’in-15 no loron 02 juñu fó posse ba diretór munisipál na’in-16.
Iha serimónia ne’e, administradór mós hato’o agradesimentu ba Vise Ministru Administrasaun Estatál no Prezidente Funsaun Públika bainhira autoridade Covalima hato’o proposta halo prosesu ho lalais.
Maske fó ona pose ba diretór munisipál na’in-16, maibé falta diretór munisipál na’in-rua tuir teste maibé la pasa hanesan diretór Saneamentu no Diretór rejistu Notariadu. nune’e sei buka meiu hato’o proposta subtituisaun.
Reprezentante Diretór emposadu Diretór Agência fikalizasaun, Francisco Mendonça da Costa “Tatamero”, hato’o agaradesimentu ba Ministru Administrasaun Estatál ho Vise-MAE hodi fó oportunidade tuir prosesu teste.
“Ha’u hato’o agradese ba Ministru Administrasaun Estatál (MAE) ho nia vise hodi fó oportunidade mai ami bele tente konkursu rekrutamentu pór méritu ne’ebé bele simu ona pose “, nia dehan.
Iha serimónia pose ne’e, reprezentante diretór empozadu sei desempeña servisu hanesan Funsionáriu Públiku kompromitidu hala’o kna’ar tuir kompeténsia ne’ebé hatuur ona iha dekretu-lei númeru 3/2016 ho alterasaun dekreu lei-númeru 54/2020 no kumpre lei funsionáriu públiku.
“Funsionáriu hala’o kna’ar ho onestu, kumprimentu, lealidade, transparánsia no responsabilidade, bazeia ba juramentu kesi ami. Ami sei la sees hosi lei o hotu ne’ebe kesi ami,” nia hateten.
Diretór Servisu Munisipál 16 ne’ebé simu pose mak hanesan Diretór Servisu Munisipál Administrasaun no Rekursu Umanu, Jacinto dos Santos, Diretora Patrimóniu no Losjístika, Germana Guterres Amarál, Diretór Servisu Aprovizionamentu Alarico do Nascimento.
Diretór Planiamentu Integradu Dezenvolvimentu, Albino Carvalho Lelo, Diretór Apoiu Organizasaun Noun Gobernamentál no Organizasaun Komunitária, Agustinho Mendonça, Diretór Servisu Edukasaun Covalima, Francelino Freitas Carvalho, Diretór Seguransa Alimentár, Domingos Gusmão,
Diretór Servisu Munisipál Obra Públika no Transporte, Alberto Cardoso, Diretor Servisu Munisipál Agrikultura, Reinaldo Moniz Coli, Diretor Gestaun Mecado no Turizmu, Vitorino do Carmo, Protesaun Sivíl Jestaun no Dezastre Naturál, Quintino da Costa, Diretór Asaun Sosial, Anacleto do Nascimento.
Diretór Agência Munisipál no Planiamentu, Agostinho Gusmão, Diretór Agência Munisipál no fisKalizasaun, Francisco Mendonça da Costa, Diretór Servisu Munisipál no Finansa, Damião Amarál, Diretór Servisu Munisipál no Saúde, Maria de Fátima Moniz.
Jornalista : Celestina Teles
Editor : Cancio Ximenes
