Japaun instala ona sentru saúde foun iha Uaimori
DILI, 02 juñu 2023 (TATOLI) – Governu Japaun liuhosi nia embaxadór iha Timor-Leste Tetsuya KIMURA, hamutuk ho Ministra Saúde (MS) Odete Maria Freitas Belo no Januario Soares, Administrador Munisipiu Viqueque selebra instalasaun postu saúde iha Suku Uaimori.
“Ida ne’e hanesan fasilidade saúde ba dala sanulu-resin-lima ne’ebé harii ou reabilita no suporta fundu husi Governu Japaun liuhosi eskema ida ho naran programa Fundu Asisténsia ba Projetu Komunitáriu no Seguransa Umana (GGP) ne’ebé lansa iha Timor-Leste iha tinan 2000”, Embaxadór Japaun dehan liuhosi komunikadu ne’ebé Agência TATOLI asesu, ohin.
Postu saúde foun ne’ebé inagura kompostu hosi sala konsultasaun, sala partu, laboratóriu, haris-fatin no farmásia ne’ebé sei fornese asesu di’ak liubá atendimentu saúde ba ema hamutuk na’in- 2,275 iha Suku Uaimori no sei ajuda komunidade sira hala’o moris ne’ebé saudável liu.
Governu Japaun fornese asisténsia fundu ho montante $92,556 ba Forum Tau Matan, ONG lokál ida ne’ebé mak implementa projetu ne’e.
Embaixadór KIMURA hatutan, importante ba Governu Japaun katak ema hotu iha mundu tomak bele hala’o moris ne’ebé seguru no protejidu.
Asesu ba atendimentu saude báziku nu’udar entre elementu sira ne’ebé importante tebes hodi alkansa objetivu ida ne’e.
Postu saude mak sentru ida ne’ebé fornese atendimentu saúde no ajuda komunidade sira ida-idak hodi halao moris ne’ebé saudável.
Tanba ne’e, Governu Japaun apoiu ona konstrusaun postu saude iha munisípiu sira, mesmu fatin sira ne’e susar atu asesu.
Iha Munisípiu Viqueque, Japaun apoiu ona postu saude rua, ida iha Suku Uaimori no ida seluk iha Suku Uabubo.
Desde lansamentu projetu dahuluk iha tinan 2000, projetu hamutuk 136 mak implementa ona liuhosi eskema GGP iha Munisipiu 14 iha teritóriu Timor-Leste.
Projetu sira ne’e liuliu fornese asisténsia ba infraestrutura komunitária, hodi responde ba komunidade sira-nia nesesidade báziku oioin iha nível baze.
Jornalista: Hortencio Sanchez
Editór :Zezito Silva
