iklan

HEADLINE, SEGURANSA

Kazu konfrontu Tashilin, PNTL detein ona suspeitu na’in-ualu

Kazu konfrontu Tashilin, PNTL detein ona suspeitu na’in-ualu

Komandante Jerál PNTL, Henrique da Costa ho segundu komandante Pedro Belo. sesta 2/6/2023. Imajen TATOLI/Antonio Daciparu

DILI, 02 juñu 2023 (TATOLI) – Komandante Jerál Polísia Nasionál Timor-Leste (PNTL),  Komisáriu Jerál Polísia Herique da Costa, informa kazu konfrontu ne’ebé mak akontese iha Suku Tashilin, Postu Administrativu Zumalai, Munisípiu Covalima, PNTL detein ona suspeitu na’in-ualu.

Konfrontu ne’e akontese iha segunda (29/5) madrugada entre Grupu Arte Marsiál Persaudaraan Setia Hati Terate (PSHT) no Kmanek Oan Raik Laran (KORK) ne’ebé rezulta komunidade nia sasan hanesan uma, kadeira meja no parabola hetan estragu.

Hafoin akontesimentu, ekipa patrollamentu hosi Komandu PNTL eskuadra Postu Zumalai  ne’ebé hetan atendimentu hosi apoiu Batalão Ordem Públiku (BOP) halo kedan intervensaun.

“Ita-nia parte patrolla kedas no horseik konsege foti ona suspeitu na’in-ualu, agora daudaun iha ona Komandu Munisípiu Covalima”, Komisáriu Jerál Polísia Herique da Costa hateten ba jornalista sira iha Komandu Jerál PNTL, Caicoli sesta ne’e.

Nia dehan, aleinde Komandu PNTL asegura ona suspeitu na’in-ualu ba kazu konfrontu ne’e, Komandu PNTL Covalima mós identifika tán ema nain 10 ne’ebé dekonfia envolve kazu.

“Iha tempu badak, sira aprezenta iha Komandu Munisípiu Covalima atu kontinua prosesa. Kuandu sira la aprezenta aan, ita sei promove sira ba Ministériu Públiku hodi husu mandandu detensaun ba sira atu detein sira ba sala detensaun Komandu Munisípiu Covalima”, Komisáriu Jerál Herique da Costa adianta.

Nia esplika, bazea ba informasaun ne’ebé Komandu PNTL Munisípiu relata ba Komandu Jerál katak kazu konfrontu ne’e kauza hosi Grupu Arte Marsial PSHT no KORK.

“Tuir istória sira-nia katak kazu ne’e envolve Grupu Arte Marsial PSHT no KORK nian ema ne’ebé treinu grupu rua ne’e mak ataka malu, tanba ne’e Komandu halo ona komunikasaun ho Komisaun Reguladora Arte Marsial (KRAM) no resposavél grupu sira ne’e atu solusiona problema sira ne’e’’, nia dehan.

Atu evita konfrontu sira ne’e, Komandane Jerál PNTL husu ba lider arte marsiál sira tenke kontrola nia elementu no joven sira tenke hadomi malu.

“Tanba matenek ne’ebé ita hetan liuhosi treinu nian ne’e uza tuir nian dalan, la’os uza fila fali treinu sira ne’e ba para hodi kria fali problema, hodi halo fila fali krime, hodi kria fila fali instabilidade iha nasaun ida ne’e”, nia konklui.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!