iklan

EDUKASAUN, HEADLINE

MEJD atribui sertifikadu rekoñesimentu ba serbisu jornalista iha área edukasaun

MEJD atribui sertifikadu rekoñesimentu ba serbisu jornalista iha área edukasaun

Ministru Edukasaun, Juventude no Desportu, Armindo Maia.Imajen TATOLI/Egas Cristóvão

DILI, 02 juñu 2023 (TATOLI) – Ministru Edukasaun Juventude no Desportu, Armindo Maia, atribuiu sertifikadu rekoñesimentu ba jornalista sira ne’ebé durante ne’e hala’o kobertura iha área edukasaun nian.

Atribuisaun serifikadu ne’e ba jornalista husi Ajénsia Tatoli na’in-hitu, RTTL tolu, STL neen, Independente tolu, Média Mudansa rua, Timor Post ida no Televizaun Edukasaun ida.

MEJD atribui sertifikadu rekoñesimentu ba serbisu jornalista iha área edukasaun.

Entrega sertifikadu ida ne’e hanesan tradisaun ida ne’ebé dezde uluk halo iha Ministériu Edukasaun bainhira Governu ida nia mandatu atu remata.

Ministru Armindo Maia hato’o agradesimentu ba jornalista sira atu nafatin serbisu ho responsabilidade hodi tau interese Estadu nian aas, nune’e bele lori susesu ba ema hotu.

“Ha’u husu nafatin ba mídia, liuliu jornalista destakadu sira iha MEJD ba nia servisu hamutuk durante tinan lima nia laran no bele kontinua hamutuk ho Governu foun ne’ebé sei mai. Ha’u nafatin enkoraja imi-nia servisu hamutuk ho líder foun ne’ebé sei mai atu la’o di’ak liután”, Armindo Maia dehan iha ámbitu atribui sertifikadu ba jornalista sira iha Vila Verde, sesta ne’e.

Governante ne’e husu jornalista sira ne’ebé kobre setór edukasaun ne’e atu haka’as-aan hodi apoia serbisu Ministériu Edukasaun nian hodi divulgasaun informasaun fidedigna ba públiku.

Ministru esplika mídia nia papél importante tebes iha mundu, liuliu iha país demokrátiku sira hanesan iha Timor-Leste. Daudaun ne’e país nia ranking ba liberdade imprensa aas tebes iha Ázia. “Ne’e hatudu katak Estadu noGovernu tau duni importánsia ba mídia atu hetan ninia liberdade hodi hato’o informasaun ba públiku”.

Tuir Repórter Sem Fronteiras, Timor-Leste okupa pozisaun da-10 liga ba liberdade imprensa husi nasaun 180.

“Iha ha’u nia mandatu nu’udar Ministru Edukasaun sempre kolabora di’ak ho mídia sira, liuliu jornalista destakadu sira atu divulga informasaun kona-ba saida maka ministériu ne’e halo atu públiku bele hatene”, nia salienta.

Hodi hatutan katak mídia nia papél maka atu divulga informasaun sira mai husi leten ba povu sira iha baze atu hatene saida mak governante sira halo no informa fali ba líder sira preokupasaun saida maka povu sira enfrenta atu ukun-na’in sira bele hatene hodi buka solusaun ruma ba asuntu sira ne’e.

“Papél mídia nian mós hanesan ponte ida ne’ebé sei loke dalan ba governu no povu atu rona malu no simu malu hodi hatuur hanoin hamutuk atu lori dezenvolvimentu ida sustenstavél ba progresu governasaun nomós ba nasaun ida. Maibé dalaruma iha informasaun balun maka mídia sira hato’o ladún loos, maibé ho serbisu hamutuk problema sira ne’e bele rezolve mós ho di’ak”, realsa.

Jornalista: Tomé Amado  

Editora: Maria Auxiliadora

iklan
iklan

Leave a Reply

iklan
error: Content is protected !!