MSSI lansa dadus problema bem-estar 2021 no planu implementasaun sosiál
DILI, 02 juñu (TATOLI) – Ministériu Solidariedade Sosiál no Inkluzaun (MSSI) halo lansamentu ba rekollamentu no prosesamentu dadus ba ema ho problema bem-estar 2021 no planu implementasaun estratejia nasionál protesaun sosiál 2021-2023.
“Ohin ita aprezenta ita-nia relatóriu estratejia nasionál protesaun sosiál ne’ebé ita boot sira hatene, ita lansa iha 2021, agora ne’e ita aprezenta primeira relotóriu husi 2021 ba lansamentu dokumentu polítika ne’ebé ita halo ona nia planu no atividade sira, entaun rezultadu sira iha ona ita mai hamutuk iha fatin ida ne’e hodi aprezenta”, Vise Ministra Solidaridade Sosiál no Inkluzaun (MSSI) Signi Sandrawati Verdial dehan iha salaun MSSI, ohin.
Nia rekorda, hahú husi 2021 mai MSSI rekolla dadus sira no ohin ikus bele iha dadus ida própriu por volta 33.993 ema kbiit laek mak eziste ho problema, tipu problema sosiál oioin.
Nia esplika, tipu problema oioin mak hanesan labarik iha risku no perigu hamutuk 984, adosaun labarik 897 no labarik ne’ebé moris iha kuidadu paternál hamutuk 671. Labarik nakar hamutuk 39, labarik konflitu ho lei hamutuk 54, labarik tane liman hodi husu ezmola nain hitu, ema ne’ebé moris lemo lemo 64, konsumu droga na’in rua no vítima bazeia ba jeneru hamutuk 413.
Ema ho difisiénsia hamutuk 6.472 ema ho moris króniku 2.606 eis prizoneiru vunerável 174, ferik katuas abandona moris 3.439. Feto risku sosiu ekonómiku hamutuk 5657, família kiak 6.613, família uma la iha atu hela 5.087, vítima dezastre naturais 194 no problema seluk hamutuk 620.
“Aproveita oportunidade ida ne’e ita mós lansa ita-nia dadus, maibé dadus sira ne’e presiza atualiza nafatin kada tinan, dalaruma tinan oin bele mosu fali ema seluk mai ho problema sosiál oin seluk, entaun hanesan ohin ha’u dehan, estratejia ne’e rasik nia foka espesiál oinsa atu fó apoiu ba ita-nia ema ne’ebé monu, labele atu proteze no monu ba risku vulnerabilidade sira”, nia afirma.
Nia esplika husi dadus ne’ebé rekolla maioria barak liu ho problema sosiál barak monu ba iha risku vulnerabilidade.
“Dahuluk mak ita-nia idozu sira, ida mak ita-nia ema ho difisiénsia, ida mak feto no labarik sira, ida fali mós ita-nia grupu abandonadu sira balun, ne’e kruza teb-tebes ho programa ne’ebé ita tau iha estratejia, entaun dadus sira rasik hatudu katak ema sira ne’e mak iha faze ida ne’ebé mak vulneravel ita tenke tau duni programa sira atu responde ba ita-nia maluk sira ne’ebé mak iha situasaun ida ne’ebé mak difisil”, nia konklui.
Jornalista : Felicidade Ximenes
Editór : Zezito Silva
