HEADLINE, LIFESTYLE, MUNISÍPIU, OÉ-CUSSE (RAEOA), SOSIEDADE SIVĺL

Projetu turizmu kulturál Nunuhenu atraza tanba disputa rai

Projetu turizmu kulturál Nunuhenu atraza tanba disputa rai

Projetu turizmu Kulturál Nunuhenu. Imajen Tatoli/ Abílio Elo Nini.

OÉ-CUSSE, 02 juñu 2023 (TATOLI) – Diretór Rejionál Infraestrutura, Candido dos Reis Amaral, projetu turzmu kulturál Nunuheno ne’ebé konstrui iha aldeia Noeninen, suku Cunha, Rejiaun Administrativa Espesiál Oé-Cusse Ambeno (RAEOA), nia progresu fíziku foin atinje pursentu 80.

Tuir nia, loloos projetu remata ona iha 2022, tanba durasaun kontratu fulan tolu, hahú ezekuta iha 2021, maibé atraza tanba projetu ne’e rasik envolve komunidade nia rai, nune’e afeta ba konstrusaun.

Notísia relevante: Fatin simu sakramentu batizmu dahuluk iha RAEOA, transforma ba turizmu kulturál

Tan ne’e Autoridade deside hodi extende, nune’e Autoridade liuhosi Diresaun Terra realiza mediasaun konsege hetan solusaun, maibé hela lutu maka sei kontinua iha disputa.

“Primeiru tanba problema rai, iha impedimentu hosi komunidade tanba projetu ne’e kona komunidade sira-nia natar, maibé agora iha ona solusaun, agora nia progresu to’o ona 80%, lutu maka sei iha faze negosiasaun ho komunidade, ita hein de’it parte Terra Propriedade sei aprezenta rezultadu mai ita, kona-bá kontinuasaun ba lutu nian ne’e oinsá,” Candido Amaral, relata ba Tatoli iha Oé-Cusse, sesta ne’e.

Projetu konstrusaun turizmu kulturál Nunuhenu ne’e,  ezekuta hosi empreza Grand Enklave Unip. Lda, ho valór orsamentu $440.844.93, ne’ebé aloka hosi Orsamentu Jerál Estadu (OJE) 2021 nian ho nia  durasaun serbisu durante loron 120 ne’ebé envolve traballadór hamutuk na’in-14.

“Projetu ne’e hahú kedas iha 2021, to’o agora seidauak finaliza tanba iha asuntu disputa rai, entaun presiza rezolve ho komunidade,” nia afirma.

Notísia relevante: Progresu konstrusaun turizmu kulturál Nunuhenu Oé-Cusse atinje 38%

Entretantu, área ba konstrusaun fatin istóriku turízmu kulturál ne’e, hamutuk ektare 22, área semitériu inklui kapela kuadradu 4.760 ho nia medida ba konstrusaun metru kuadradu 15×12 no 7×24.

Ba hariis-fatin unidade rua ho nia medida metru 3×6 ho totál área metru kuadradu 18, no postu seguransa unidade rua ho nia medida metru 2,5×2,5 ho totál área metru kuadradu 6,25.

Nune’e kompleta ho lutu haleu fatin turízmu kulturál kilómetru 1,870, inklui portaun unidade rua, ida nia medida metru 11, ida seluk metru 6,5, nomoos dreinajen.

Notísia relevante: Ohin, Dom Virgílio fó bensaun ba turizmu kulturál iha RAEOA

Jornalista: Abílio Elo Nini

Editor: Evaristo Soares Martins

iklan
iklan

Leave a Reply

iklan
error: Content is protected !!