Rejistu sivíl Covalima labele atende pasaporte eletróniku expira ona
COVALIMA, 02 juñu 2023 (TATOLI)—Diretór Munisipál Konservatóriu Rejistu Notariadu Covalima, António Sarmento, hateten Rejistu sivíl Notariadu Covalima labele atende sidadaun atu estende pasaporte eletróniku ne’ebé expira hahú fulan-maiu 2022 to’o janeiru 2023, maibé Dirasaun Jerál mak bele estende pasaporte eletróniku espira ona.
“Ami iha munisípiu labele atende sidadaun atu estende pasaporte eletróniku ne’ebé espira ona maibé Diresaun jerál mak bele atende sidadaun atu estende pasaporte eltróniku ne’ebé expira hosi fulan-maiu 2022 to’o 2023,” António Sarmento hatteten ba Agência Tatoli, iha nia kna’ar fatin, sesta ne’e.
Rejistu Notariadu Covalima labele estende pasaporte eletróniku ne’ebé expira, tanba Diresaun jerál mak tau karimbu estende ba sidadaun sira-nia pasaporte.
Nia dehan, bazeia ba informasaun ne’ebé Diretór Notariadu Covalima asesu hosi Dirasaun Jerál halo estende pasaporte eletróniku ba sidadaun sira-ne’ebé atu viajen ba Nasaun vijiñu Indonézia no Singapura tanba iha ona karta hosi konsuladu sira.
“Tuir informasaun ha’u hatene hosi Dirasaun jerál, atu estende pasaporte ba sidadaun sira-ne’ebé atu lori ba Indonezia ho singapura de’it, tanba iha ona akordu ka karta hosi konsuladu sira hosi nasaun rua maibé nasaun sira seluk ha’u seidauk hetan informasaun hosi dirasaun jerál,” nia hateten.
Nia relata, Rejistu Sivíl Notariadu Covalima laiha transporte atu tula materiál hosi nasionál mai iha munisípiu Covalima, nune’e funsionáriu hosi rejistu notariadu uza motorizada privadu hodi transporta materiál hanesan livru asentu, blanku billete identidade no sertidaun moris RDTL.
“Ami liha transporte, ami foti ekipamentu hanesan blanku livru asentu iha nasionál uza de’it motirizada privada. Se livru asuntu todan, ami titip tuir bus tanba livru asentu labele tula iha morizada,” nia dehan.
Iha sesta (02 maiu 2023), nia haruka ona nia funsionáriu uza morizada privada atu ba foti livru asentu iha nasionál.
“Ami halo rekezitu tuir estimasaun hosi dirasaun servisu munisipál, maibé depende hosi Dirasaun jerál, bainhira seksaun lojistíka livru asentu fahe ba munisípiu sira seluk entaun depende dirasaun jerál fó ba munisípiu Covalima,” nia hateten.
Tuir dadus hahú fulan-janeiru to’o fulan-maiu, sidadaun ne’ebé trata Sertidaun moris hamutuk 11,60, sertidaun kazamentu na’in-36, sertidaun óbitu-35 no sertidaun trata rejistu Kriminál hamutuk-852.
Jornalista : Celestina Teles
Editór : Cancio Ximenes
