DILI, 04 juñu 2023 (TATOLI)-Partidu Frente Revolusiónaria Timor-Leste Independente (FRETILIN), deklara simu rezultadu eleisaun parlamentár tinan 2023 ne’ebé deside hosi Povu.
“FRETILIN dezde uluk kedas simu rezultadu. Povu seidauk lakon konfiansa totál ba FRETILIN. Iha polítiku ne’e sempre iha dezafiu. Ami simu. Ne’e maka ohin ami hateten, ami rekoñese, ne’ebe ami sei sai opoisizaun, rezultadu ne’e fó ba ema sé, ema-ne’ebé mak manán tenke ukun, ami sei la hadau,” Portavos partidu FRETILIN, José Manuel Fernandes ‘Nakfilak’ hateten ba jornalista sira hafoin remata enkontru avaliasaun partidu FRETILIN nian ne’ebé mak hala’o iha Tower Fatuhada, domingu ne’e.
Nia dehan, iha enkontru avaliasaun ne’e líder FRETILIN sira inklui membru partidu FRETILIN sira só koalia de’it kona-ba situasaun eleisaun parlamentár nian, liuliu lakuna sira-ne’ebé mak halo FRETILIN derrota iha eleisaun.
Tanba, orgauniazasaun partidaria hanesan FRETILIN ne’e sempre iha difikuldade, dezafiu no derrota.
“Ami halo avalisaun kona-ba rezultadu, laiha tán buat seluk mak ami halo. Ami hatene katak FRETILIN derrota, no agora ami tenke prepara ba hakarak ba oin maibé labele denunsia agora,” nia afirma.
Membru CCF ne’e rekoñese, eleisaun ida agora partidu FRETILIN lakon maka’as tanba kadeira tún ba 19, maibé FRETILIN sei la lakon fiar hosi povu.
“Ha’u la fi’ar ami so bele hela de’it ho kadeira ida-ne’e. Esperansa FRETILIN ba 2028 ne’e FRETILIN tenke fila,” nia hateten.
Nia dehan, FRETILIN hein Prezidente Repúblika bele afirma posizaun loloos, no agora dadaun provizoriumente FRETILIN seidauk afirma buat ruma tanba eleisaun sei iha hela prosesu,L.
“Imi hatene bainhira maka CNRT hakarak ukun ho FRETILIN, karik ita hein hotu. Maibé ami seidauk iha komunikasaun ho CNRT maske iha espekulasaun balun iha li’ur hatene ona buat balun,” nia akresenta.
Jornalista: Natalino Costa
Editór: Evaristo Soares Martins
