DILI, 05 juñu 2023 (TATOLI) – Diretór Ezekutivu Interinu Servisu Autónomu Medikamentu Ekipamentu Saúde (SAMES), Octavio Fernandes, hateten aimoruk stock out iha armajen SAMES hamutuk pursentu 19.
“Ita-nia aimoruk ho item hamutuk 458, husi ne’e estoke ne‘ebé mak disponível iha armajen SAMES hamutuk 371 ka 81 % no estoke out hamutuk 87 ka 19%“, Octavio Fernandes dehan ba jornalista sira iha nia kna’ar fatin SAMES, ohin.
Nia hateten, husi item 458 ne’e aimoruk vital ne’ebé disponível hamutuk 105 ka 85% no estoke ne‘ebé mak la iha hamutuk 18 item ka 15%. Aimoruk esensiál ne‘ebé daudaun disponível hamutuk 171 ka 77% no estoke ne’ebé mak la iha hamutuk 50 ka 23%. Aimoruk nesesáriu ne‘ebé daudaun ne‘e disponível hamutuk 89 ka 83% no estoke ne’ebé mak la iha hamutuk item 18 ka 17%.
‘‘La’os aimoruk de’it maibé iha mós estoke konsumaveis, entaun estoke ne‘ebé disponível ne’e hamutuk 415 ka 83% no estoke ne’ebé la iha hamutuk 83 ka 17%“, nia hateten.
Nia afirma, estoke ba laboratóriu ne‘ebé daudaun disponível hamutuk 212 ka 57% no estoke ne’ebé la iha 162 ka 43%. Aimoruk ba espesiál médiku ne‘ebé disponível hamutuk 41 ka 68% no estoke ne‘ebé mamuk 19 ka 32%. Estoke ba hemodialise ne‘ebé disponível iha SAMES hamutuk 13 ka 100%, estoke ba medikamentu ekipamentu ne’ebé disponível hamutuk 95 ka 83% no estoke ne’ebé mak la iha 10 ka 21%.
Estoke ba radiolojia ne’ebé disponível hamutuk 13 ka 81% no estoke ne’ebé mak la iha hamutuk tolu ka 19% no estoke ba ekipamentu osijéniu iha SAMES ne’ebé disponível hamutuk 5 ka 83% no estoke mamuk iha 1 ka 17%.
“Husi estoke mamuk sira ne’ebé mak iha SAMES halo ona kontatu ho fornesedór sira atu hatama ona aimoruk no mós konsumaveis sira mai iha semana ida ne‘e nia-laran, entaun ita bele rezolve ona estoke mamuk sira ne’e“, nia konklui.
Jornalista : Felicidade Ximenes
Editór : Zezito Silva
