Eskola CAFE Oé-Cusse selebra loron mundiál meiu ambiente ho atividade rua
OÉ-CUSSE, 05 juñu 2023 (TATOLI) – Estudante sira hosi Sentru Apredizajen Formasaun Eskolár (CAFE, sigla portugés) primeiru síklu Palaban, Rejiaun Administrativa Espesiál Oé-Cusse Ambeno (RAEOA), segunda ne’e selebra loron mundiál meiu ambiente ho atividade rua, hodi hamoos ambiente eskola no kuda ai-oan.
Loron Mundiál Meiu Ambiente mak loron ne’ebé koñesidu iha ámbitu asaun ambientál. Selebra dezde 1974, iha loron 05 juñu, no envolve governu sira, empreza, selebridade no sidadaun iha konsentrasaun esforsu sobre problema ba kestaun ambientál.
Iha 2023, marka aniversáriu da-50 Dia Mundiál Meiu Ambiente. Tinan ne’e República da Costa do Marfim mak sai uma-na’in ba eventu ne’e, parseria ho País Baixu sira, ho tema solusaun ba poluisaun plástika.
Loron ne’e hakarak konsensializa importásia aprosimasaun ema ba meiu ambiente, nomós rekupera no atualiza Dékada ba Restaurasaun Ekosistema, 2021-2030, inisiativa seluk husi ONU nian.
Nune’e Koordenadora eskola CAFE primeiru siklu iha Palaban, Oé-Cusse, Ana Morais, informa, atividade ne’e importante atu enkoraja estudante sira atu relembra hikas loron mundiál meiu ambiente liuhosi hamoos lixu hodi proteje ambiente eskola no kuda ai-oan hodi hamatak ambiente eskola.
“Ohin loron espesiál ba loron mundiál meiu ambiente, kada estudante mai lori ai-oan ida kuda iha área eskola, kada klase kuda iha eskola oin, no destaka fatin lixu iha kada klase atu kontribui tau lixu iha nia fatin,” koordenadór ne’e informa ba Agência Tatoli iha Palaban Oé-Cusse.
Koordenadóra ne’e konfirma, iha loron mundiál meiu ambiente, atividade rua maka realiza, hanesan hala’o atividade iha kuidadu eskola liuhosi hamoos lixu sira, ida-ne’e la’ós foin mak halo maibé lor-loron ami halo, no fahe oráriu kada turma, hahú hosi segunda no sesta.
“Ida-ne’e insiativa hosi eskola, atu hanorin estudante sira oinsao tau fo’er iha lixu fatin, atu proteje futuru ambiente eskola sai moos no fresku,” nia afirma.
Purtantu, ai-oan ne’ebé estudante sira kuda mak hanesan, ai-dila, ai-ata, hudi, haas, kulu, derok no seluk tán.
Entretantu, totál estudante iha eskola CAFÉ Palaban Oé-Cusse hamutuk na’in 300-resin komposta hosi pré-eskolár primeiru no kuartu ano primeiru síklu, ho totál profesór hamutuk na’in-12 komposta hosi permanente no kontratadu.
Jornalista: Abílio Elo Nini
Editór: Evaristo Soares Martins
