Top

Korea Súl prontu apoiu Timor-Leste adere ba ASEAN

Prezidente Repúblika, José Ramos Horta. Imajen Tatoli/Egas Cristovão

DILI, 05 juñu 2023 (TATOLI)—Prezidente Repúblika (PR), José Ramos Horta, segunda ne’e to’o hikas mai Timor-Leste, hafoin halalo vizita traballu ba Repúblika Koreia Súl ho Singapura.

PR Horta hateten, foin mak ramata programa vizita ba Repúblika Korea Súl ne’ebé ba akompaña hosi Ministra Negósiu Estranjeiru no Kooperasaun (MNEK) ba partisipa iha fórum mundiál Jeju ba dala-18, hala’o enkontru ho Governadór illa Jeju, PR Horta konvida Governadór atu mai vizita Timor-Leste.

Governadór ne’e simu konvite no agora sei formaliza konvite atu mai hodi bele haree kooperasaun espesiál provínsia illa Jeju ho munisípiu ruma, ko’alia liu kona-ba relasaun bilaterál no Korea Súl pronto apoiu Timor-Leste adere ba ASEAN.

“Hasoru malu mós ho Prezidente Parlamentu Nasionál Korea, líder maiória iha Parlamentu, PrimeiruMinistru no ema lubun iha illa Jeju, hafoin liu ba Seoul hasoru Prezidente Repúblika Korea, ko’alia kona-ba relasaun bilaterál hodi haree liután kona-ba situasaun adezaun Timor-Leste ba ASEAN. Nune’e, Korea do Súl mós prontu atu apoiu formasaun tékniku profisionál,” PR Horta hateten ba jornalista sira iha aeroportu Internasionál Nicolau Lobato, Comoro.

Nune’e ós, PR Horta ko’alia mós ho kompañia Samsung no kompañia balun tan, ne’ebé iha ona akordu ho Timor-Leste no sei haree saida tan mak sira halo,

“Iha Korea, ha’u mós hasoru mós ho universidade ida iha ne’ebá no tékniku profisionál sira hakarak rekruta timoroan lubun ida ba universidade hodi tuir formasaun tékniku profisionál. Aumezmu tempu, serbisu daudaun kuandu ramata, sira-nia serbisu kontinua ho kompañia maibé ne’e asuntu matéria sira-ne’ebé Governu mak tenke follow-up,” nia dehan.

Xefe Estadu agradese ba Embaixadór Korea iha Timor-Leste ne’ebé fasilita enkontru sira iha Korea Súl sempre ativu.

Iha parte seluk, Prezidente Repúblika, José Ramos Horta, atualiza mós vizita iha Singapura hodi partisipa iha Sangri-la dialogue 2023 tanba hetan konvite.

Oportunidade ne’e halo mós enkontru ho Prezidente Singapura, Ministru Defeza Singapura no iha enkontru informál entidade lubun ida hanesan Inglatera ho autoridade sira seluk.

“Sira hotu-hotu simu di’ak liu-liu buat ne’ebé ha’u sempre ko’alia klaru liu mesajen Timor nian iha situasaun mundiál, rejional, tensaun boot perigozu, situasaun iha Myanmar, situasaun defisil iha mundu, Timor kontinua ezemplu ida hanesan demokrasia no dame,” nia hateten.

Xefe Estadu ne’e dehan, vizita ne’e la’o di’ak no hetan akompaña Minista MNEK no asuntu balun pertense Governu sei halo follow-up, nune’e Governu foun mai tenke halo segimentu.

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!