DILI, 05 juñu 2023 (TATOLI) – Xefe Departamentu Emerjénsia, Hospitál Nasionál Guido Valadares (HNGV), Eldegar Lopes Martins, informa durante fulan maiu, iha sala emerjensia HNGV rejista pasiente sira hamutuk rihun-tolu resin.
“Iha fulan maiu, pasiente ne’ebé mak mai vizita iha emerjénsia hamutuk rihun-tolu resin, husi totál ne’e, iha kazu oinoin ne’ebé konsege baixa iha emerjénsia no kazu sira ne’e balun ba baixa iha sala maternidade hamutuk 458, baixa iha interna 246, baixa iha sirurjia 86, baixa iha pediatria 139, baixa iha perinatolojia iha 41 no sira ne’ebé mak mai ita halo observasaun de’it iha emerjénsia hamutuk 2.487”, Eldegar Lopes Martins informa iha nia kna’ar fatin HNGV, ohin.
Nia dehan, HNGV nafatin implementa sinais tolu ne’ebé mak durante ne’e pasiente sira mai HNGV tenke la’o tuir.
“Iha hospitál ne’e ita nafatin implementa buat ida mean, kinur ho matak, entaun liña mean mai iha ne’e hamutuk 717 pasiente, signifika sira ne’e mak presiza halo atendimentu husi espesialista sira”, nia esplika.
Nia hateten, pasiente sira mai ho kategoria kinur hamutuk 2.040, sira ne’e mai konsege observa duni iha emerjénsia, maibé médiku sira haruka fila no kazu kategoria matak pasiente hamutuk 2.887, kazu sira ne’e signifika sira la presiza mai iha ne’e, tanba kazu baibain sira bele ba sentru saúde no postu saúde sira ne’ebé besik, halo tratamentu saúde.
“Ami atende mak kazu tersiariu, maibé ba kazu sira ne’ebé mak kaman ne’e bele ba iha sentru saúde no postu saúde, bainhira sira ba sentru saúde no postu saúde, pesoál sira atende tiha, karik labele ona mak bele transferénsia fali mai iha HNGV”, nia afirma.
Nia subliña, iha sala emerjénsia mós enfrenta hela kama tanba ne’e ba kazu kaman sira la presiza mai to’o HNGV maibé ba sentru saúde ne’ebé mak besik.
“HNGV problema ho kama, tanba iha emerjénsia ita iha kama 35 de’it, maibé dala barak pasiente sira mai barak no pasiente sira ne’ebé mai observasaun de’it mós barak, tuir lolos ne’e pasiente sira ne’ebé mak halo observasaun bele ba fasilidade saúde sira hanesan sentru saúde no postu saúde sira ne’ebé mak besik ita bot sira”, n revela.
Iha fulan maiu emerjénsia HNGV rejista mós ema sira ne’ebé mate iha uma ka mate iha dalan mak lori mai hamutuk na’in tolu, kazu krime na’in ida, kazu ema sona na’in haat, kazu ema tuda kanek na’in neen no kazu rama ambon na’in ida.
Kazu sira hanesan asidente motor hamutuk 119, asidente karreta na’in 14, depois iha kazu sira hanesan ema sira ne’ebé mak koko atu oho an iha na’in rua no kazu dengue hamutuk 107.
Jornalista : Felicidade Ximenes
Editór : Zezito Silva
