VIQUEUQE, 05 juñu 2023 (TATOLI)-–Konsellu Konsultivu Munisipál (KKM) Viqueque, segunda ne’e halo enkontru hodi armoniza programa prioridade sira hosi Planu Dezenvolvimentu Integradu Munisipál (PDIM) tinan 2023-2024, ho objetivu atu define planeamentu tuir menu indikativu sira liuhosi setór hotu iha munisípiu rasik ne’ebé sai hanesan prioridade.
“Diskusaun ida-ne’e hotu ami sei marka loron-ida hodi membru Konselu Konsultivu sira halo apresiasaun hafoin submete ba nasionál. Tanba ne’e, diskusaun ida-ne’e sei tau prioridade ba fatin lixu munisípiu Viqueque ba futuru konstrusaun fatin lixu,” Administradór munisípiu Viqueque, Januário Soares ‘Bolly’, informa iha nia knaar fatin, Beloi.
Nia dehan, antes-ne’e identifika ona fatin iha dalan ba Kararas, maibé kondisaun rai la permite kria fatin lixu, tanba ne’e KKM sira haree filafali fatin foun ruma.
“Diskusaun ne’e ko’alia mós ba futuru konstrusaun edifísiu administrasaun Viqueque no ospitál munisipál ne’ebé daudaun ne’e sei iha prosesu loke dalan. Tau nafatin ba programa prioridade ba tinan 2024,” nia akresenta.
Notísia relevante : Munisípiu Viqueque tau prioridade kria fatin lixu iha tinan 2023
Nune’e, KKM armoniza filafali planu tinan 2021 sira ne’ebé la konsege implementa, tau nafatin prioridade hodi implementa iha tinan 2023 no 2024 nian laran.
“Iha programa balun parte nasionál responde ona, ba projetu sira-ne’ebé maka ita seidauk halo, ita hamutuk hodi haree no halo apresiasaun ba programa sira-ne’e,” Administradór tenik.
Ministériu Administrasaun Estatál (MAE) emite despaixu kona-ba siklu implementasaun PDIM ne’ebé munisípiu sira sei banati tuir. Tuir despaixu antes númeru 40/M-MAE/X/2022, kona-ba Prosesu Elaborasaun Planu Investimentu Munisipál (PIM) ba tinan 2024, haktuir kalendáriu elaborasaun PIM 2024.
Nune’e mós, haktuir knaar PDIM artigu 13 no dekretu-lei númeru 54/2020 hanesan alterasaun daruak ba dekretu-lei númeru 3/2016 kona-ba Estatutu Administrasaun Munisipál ka Autoridade Munisipál no Grupu tékniku inter-ministeriál kona-ba desentralizasaun administrativa.
Iha fatin hanesan, Diretór PDIM Viqueque, Domingos de Carvalho Monteiro, deskreve, KKM ne’e hodi hatuur planu investimentu lori munisípiu Viqueque ba oin.
“Liuhosi diskusaun ne’e atu hatuur menu prioridade sira-ne’ebé mai hosi diresaun ida-idak iha munisípiu Viqueque. Nune’e ami sei haree programa prioridade ne’ebé merese foti tanba munisípiu konsentra ba planu hodi lori bá Parlamentu hodi hetan aprovasaun orsamentu. Ita munisípiu hatuur planu no orienta ba enjiñeiru PDIM hodi halo verfikasaun dadus sira,” nia hato’o.
Programa Prioridade seluk maka hanesan setór agrikultura liu-liu irrigasaun, estrada, ambiente, saúde no seluk tan.
Enkontru KKM Viqueque partisipa hosi Administradór postu lima, xefe suku inklui diretór liña ministeriál.
Jornalista : Vitorino Lopes da Costa
Editora : Julia Chatarina
