iklan

NASIONÁL, POLÍTIKA

PR Horta hakarak ajenda pose ba Deputadu foun iha juñu nia laran

PR Horta hakarak ajenda pose ba Deputadu foun iha juñu nia laran

Prezidente Repúblika, José Ramos Horta. Imajen Tatoli/Egas Cristovão.

DILI, 05 juñu 2023 (TATOLI)—Prezidente Repúblika (PR), José Ramos Horta, hakarak ajenda pose ba Deputadu foun Parlamentu Nasionál iha fulan-juñu ne’e nia laran.

“Tribunál Rekursu, ha’u hanoin ohin lorokraik duni halo ona nia pronúnsiamentu kona-ba rezultadu no ho ne’e konfirma maiória iha Parlamentu. Ha’u espera no ha’u sei ko’alia ho Prezidente Parlamentu Nasionál, nune’e hamutuk ita marka ona data ba ajendamentu ba pose Parlamentu Nasionál foun, para Governu foun bele toma pose,” PR Horta hateten ba jornalista sira iha aeroportu internasional Nicolau Lobato, Comoro, segunda ne’e.

Xefe Estadu hatutan, ninia intensaun aban ka bainrua depende ba disponibilidade Prezidente Parlamentu Nasionál hodi ko’alia rápidu no aselera ajendamentu tuir tramitasaun hotu nesesáriu ba pose Parlamentu foun no tuir mai pose Governu foun.

“Ha’u sei ko’alia ho Prezidente Parlamentu, nune’e aselera prosesu ne’e, iha fulan ida-ne’e duni, iha juñu ne’e, tenke urjente,” nia hateten.

Nune’e, Horta hateten, Governu foun aprezenta programa ba Parlamentu Nasionál (PN) tanba ajenda nasionál no internasionál kle’an tebe-tebes.

“Ha’u pesoalmente hakarak kolabora di’ak ho Parlamentu foun mai, hanesan tinan ida mai ne’e, nu’udar Prezidente kolaborasaun di’ak ho Parlamentu, Governu ba oin, ha’u hakarak ajuda kria klima ne’ebé mak di’ak iha Parlamentu laran entre bankada sira hotu-hotu.” Nia hateten.

Nune’e, timoroan hotu hamutuk tane apoiu ajenda nasionál iha planu doméstiku aselera rekuperasaun ekonómia ho di’ak, no buat ne’ebé Governu sesante hosik ba Governu foun hodi kontinua.

Hanesan Governu sesante mós simu projetu balun mai hosi Governu anteriór no ramata hanesan Portu Tibar no Kabu Submarinu seidauk ramata, aeroportu foun, no buat seluk hanesan lei ruma hakarak muda lei ne’e bele, entaun presiza iha kontinuasaun.

Enkuantu, jornalista Agenda TATOLI, segunda ne’e, hafoin ramata reuniaun plenária tenta atu konfirma ho Prezidente Parlamentu Nasionál, Aniceto Longuinhos Guterres Lopes, kona-ba meza PN bainhira mak ajendamentu ba pose ba Deputadu foun maibé nia parte lakohi atu halo entrevista.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!