Teofilo Freitas hamorin tan TL iha ASEAN Para Games
DILI, 05 juñu 2023 (TATOLI) – Atleta hosi modalidade Atletizmu Teofilo Freitas konsege konkista tan vitória hodi hetan medalla osan mean ida iha eventu internasionál ASEAN Para Games 2023 ne’ebé hala’o iha nasaun Kamboja foin lalais ne’e.
“Ha’u sente kontene los tanba oferese tan medalla osan mean ba nasaun doben Timor-Leste”, Teofilo dehan ba Agência TATOLI, via media sosial Facebook, ohin.
Rekorda fali katak medalla ne’ebé atleta timoroan ne’e rekolla hamutuk medalla osan mean haat ona ba Timor-Leste tanba iha tinan 2018 eventu ASEAN Paralimpiku hala’o iha Jakarak Teofilo konsege sai vensedór ne’ebé hetan primeiru lugar hodi simu medalla osan mean ida bainhira kompete ho nasaun hamutuk 43.
Nune’e iha tinan 2022 Teofilo mantein nia pozisaun iha eventu ASEAN Paragames ne’ebé hala’o iha Solo Indonézia konsege rekolla tan medalla osan mean rua ne’ebé kompete ho atleta hosi nassun 10 hanesan, Indonézia, Thailandia, Vietnam, Myanmar, Kamboja, Filipina, Laos, Singapura, Malazia no Brunei Darusalam.
Iha Solo Indonézia Teofilo kurida iha metru 1,500 no kurida segundu iha metru 400-800 nia nafatin sai primeiru lugar.
Vitória ne’ebé atleta ema ho difisiénsia ne’e hetan bainhira kurida iha metru 1,500 ho nasaun hamutuk 10 iha ASEAN.
Jornalista: Hortencio Sanchez
Editór : Zezito Silva
