iklan

EDUKASAUN, HEADLINE

UNTL sei harii edifísiu foun ba Fakuldade Edukasaun

UNTL sei harii edifísiu foun ba Fakuldade Edukasaun

Dekanu FEAH, Teodoro Soares. Imajen Tatoli/Tomé Amado.

DILI, 05 juñu 2023 (TATOLI) – Universidade Nasionál Timor Lorosa’e (UNTL) sei konstrui edifísiu foun ba Fakuldade Edukasaun, Arte no Umanidade (FEAH) hodi troka fali cube house ne’ebé nia kondisaun ladi’ak ona.

Dekanu FEAH, Teodoro Soares, hatete tinan ida ne’e, entre agostu no setembru, universidade sei harii edifísiu ho andár ida, ne’ebé sei iha sala aula ualu ba estudante, sala ida bá profesór no auditóriu ida ne’ebé sei akumula alunu 250.

“Ita-nia proposta ba universidade hodi harii edifísiu foun ho andár ida ba estudante no profesór sira iha Fakuldade Edukasaun ne’e tanba cube house ne’ebé ita uza hodi hala’o prosesu aprendizajen ba estudante sira ne’e dodok hotu ona”, Teodoro Soares afirma ba Tatoli iha Fakuldade Edukasaun, segunda ne’e.

Dekanu ne’e salienta katak planu harii edifísiu foun ne’e mosu husi proposta ne’ebé nia hato’o iha inísiu simu pose. Nia koloka kedan kestaun ne’e ba reitór atu tau iha konsiderasaun hodi bele harii edifísiu foun ida ba FEAH atu tulun estudante sira, tanba cube house ne’e prejudika tebes estudante sira bainhira iha tempu udan.

“Tempu ona atu troka duni edifísiu ne’ebé aat ona ba fali ida ne’ebé permanente, tanba kondisaun ne’ebé iha sempre prejudika estudante no profesór sira iha aula. Kuandu udan tun sempre sulin husi plafón ka kakuluk turuk ba sala laran halo prosesu ensinu lala’o ho di’ak”, nia dehan.

Dirijente relembra mós katak bainhira hato’o proposta ne’e, reitór simu no bolu kedan pró-reitór grande projetu hodi koloka kestaun ne’e iha planu. Husi esforsu ne’ebé iha, daudaun projetu ne’e ninia dezeñu tama ona iha prosesu aprovizionamentu hodi halo analiza ba dezeñu no la kle’ur tan bele realiza ona serimónia tau fatuk dahuluk ba konstrusaun foun edifísiu FEAH nian.

“Fulan kotuk enjeñeiru sira mai halo ona teste ba rai. Iha agostu ka setembru ne’e sira bele halo ona konstrusaun ne’e. Espera katak ho edifísiu foun ne’ebé sei mai bele garante ona ambiente foun ba estudante sira atu simu dixiplina ho hakmatek”, nia espera.

Kestiona sobre verba ne’ebé universidade prevee atu realiza konstrusaun foun ba edifísiu FEAH nian ne’e, dekanu realsa katak la hatene tanba ne’e responsabilidade grande projetu nian.

FEAH-UNTL iha departamentu hamutuk sanulu – Ensinu Biolojia, Ensinu Edukasaun Fízika no Desportu, Ensinu Fízika, Ensinu Lian Inglés, Ensinu Lian Portugés, Departamentu Lian Tetun, Ensinu Matemátika, Ensinu Kímika, Departamentu Formasaun Profesór Ensinu Báziku no Ensinu Pré-Eskolár.

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!