AILEU, 06 juñu 2023 (TATOLI) – Xefe Suku Tulatakeu Postu Administrativu Remixio Munisípiu Aileu Luisa de Andrade, informa maioria komunidade iha suku ne’e seidauk asesu ba bee-moos no Estrada, ligasaun hosi postu ba suku ho kondisaun grave no difikulta movimentasaun komunidade sira-nian.
“Ha’u-nia suku ne’e iha loos área rurál, dezenvolvimentu komesa la’o maibé neneik tebes, estrada konta aat totál, to’o agora seidauk hadia, komunidade maioria mak seidauk asesu ba bee-moos, komunidade sira la’o distánsia kilometru rua resin ba kuru bee-moos”, Xefe Suku dehan ba Agência TATOLI iha Remexio, tersa ne’e.
Ho problema hirak ne’e hotu mak hanesan autoridade suku sempre hato’o proposta ba administradór postu no munisípiu maibé seidauk hetan resposta to’o ohin loron.
Nia rekomenda ba Governu foun bele tau atensaun mós ba komunidade iha Suku Tulatakeu atu komunidade sira bele sente ukun rasik aan ida ne’e hanesan mós komunidade sira iha suku seluk.
Iha parte seluk, kona-ba eletrisidade Suku Tulatakeu, komunidade hetan ona asesu 100%.
Suku Tulatakeu kompostu hosi aldeia haat mak Samalete, Roluli, Aikurus no Dasilelo hosi númeru aldeia ne’e uma-kain hamutuk 300-resin mak seidauk asesu ba bee-moos.
Suku ne’e ho nia populasaun hamutuk 2000-resin ho uma ka’in 664 no maioria komunidade iha suku ne’e moris ho vida agrikultura.
Jornalista: Hortencio Sanchez
Editór : Zezito Silva
