Bispu Dioseze Baucau foun sei simu pose iha jullu
BAUCAU, 06 maiu 2023 (TATOLI) – Serimónia tomada pose no ordenasaun bispu Dioseze Baucau foun sei realiza iha fulan-jullu.
Prezidente komisaaun organizadora atuál Padre Parókia Santo António, Vila Antiga, Padre Manuel da Silva, SDB, esplika, preparasaun atuál hala’o liuhosi forma komisaun organizadora ne’ebé envolve autoridade administrasaun munisipál, konsellu veteranu, emprezáriu, lia-na’in inklui entidade sarani hosi dioseze Baucau.
“Enkontru tuir mai kada sesaun sei aprezenta progresu serbisu, hau bele dehan preparasaun atinji ona pursentu 10,” Prezidente Komisaun Organizadora informa ba Agência TATOLI iha Vila Antiga, tersa ne’e.
Liuhosi komisaun organizadora fahe ba kada sesaun no kontinua prepara planu no atividade relasiona ho ordenasaun episkopál ne’ebé tuir planu sei realiza iha loron-21 jullu iha areadór Igreja Katedrál Vila Antiga, Baucau.
Komisaun Organizadora mós hatoo ona konvite formál ba reprezentante Vatikanu, Kardeál Luis António Gokim Tagle hosi Filipina mak sei fó ordenasaun episkopál ba Bispu Dioseze Baucau foun maibé seidauk iha serteza atu partisipa iha serimónia istóriku ne’e.
“Agora daudaun sarani sira serbisu maka’as ba preparasaun no hau hein katak to’o loron sei realiza ho diak,” Padre Manuel da Silva akresenta.
Bispu Dioseze Baucau foun ho naran Leandro Alves hosi kongresaun Diosezanu hosi munisípiu Ermera ne’ebé antes ne’e nu’udar Padre Parókia Katedrál Dioseze Dili no sekretáriu ezekutivu episkopál timorense (CET, sigla portugés).
Dioseze Baucau rasik durante tinan-ida resin laiha bispu hafoin Bispu matebian Dom Basilio do Nacimento hakotu iis iha Ospotál Nasionál Guido Valadares (HNGV, sigla portugés) loron-30 fulan outubru 2021 bainhira hetan atakasaun fuan iha munisípiu Covalima.
Dioseze Baucau eziste iha loron-30 novembru tinan-1996 komposta hosi sarani hosi munisípiu haat hanesan Manatuto, Lautém, Viqueque no Baucau ho totál Parókia 22 inklui rezidénsia 24.
Jornalista : Natalino Belo
Editór : Evaristo Soares Martins
