DILI, 06 juñu 2023 (TATOLI) – Partidu Kongresu Nasionál Rekonstrusaun Timor-Leste (CNRT, sigla portugés) sei hato’o keixa ba Ministériu Públiku (MP) hodi husu prosesu investigasaun ba rezultadu eleisaun parlamentár 2023, tanba deskonfia mosu irregularidade ne’ebé ninia impaktu ba fraude eleitorál.
Deputada bankada opozisaun husi partidu CNRT, Carmelita Moniz, hateten partidu antes ne’e estabelese ona tabulasaun nasionál ida atu haree no analiza kona-ba ata modelu C ne’ebé fiskais forsa polítika sira rekolla iha sentru votasaun no estasaun votu sira ne’ebé estabelese iha territóriu.
Ata modelu C ne’ebé CNRT simu husi ninia fiskais sira depois halo tiha analiza, konsege identifika mosu diferensa iha buat balun ne’ebé konsidera mai husi parte lima ne’ebe fundamentál tebes no partidu konsidera mosu inkonstisténsia iha prienximentu totál votu ba partidu balun, halakon votu partidu iha sentru votasaun sira, ata C la prienxe, maibé ata B prienxe no ikus prezidente meza la autoriza atribuisaun ata C ba fiskais sira atu submete ba partidu polítiku atu analiza.
Carmelita Moniz hatutan Partidu CNRT haree no analiza hahalok sira ne’ebé konsidera tama iha asuntu lima ne’e mosu irregularidade no ninia impaktu sei tama ba fraude eleitorál, tanba iha ema balun ho hanoin katak atu halo manipulasaun ba data sira. Ne’e duni CNRT sei aprezenta evidénsia sira ne’e ba Ministériu Públiku hodi husu prosesu investigasaun ba rezultadu ne’ebé fó eleisaun ne’ebé maka finaliza ona husi rezultadu ne’ebé anunsia ikus husi Tribunál Rekursu.
Tanba husi modelu ata B ne’ebé sei transforma ba ata C ne’ebé atu entrega ba fiskais sira hodi submete ba ida-idak ninia partidu polítiku nu’udar baze fundamentál ida atu sira bele haree votu ne’ebé hanesan duni votu ne’ebé maka povu sira fó konfiansa ba partidu polítiku sira ka lae.
“Maibé husi rezultadu ne’ebé iha ami haree mosu diverjénsia. Tanba ne’e, ami haruka karta ida ba CNE atubele atribui mai ami ata B ne’ebé STAE no CNE uza hodi hatama ba baze daduu rezultadu númeru de votu partidu polítiku 17 nian ne’ebé eleitór sira fó ba partidu sira iha eleisaun parlamentár ne’e”, Carmelita Moniz ba jornalista sira iha konferénsia imprensa ne’ebé hala’o iha, Bairro dos Grilhos, tersa ne’e.
Nia dehan depois partidu CNRT simu tiha ata B husi STAE no CNE sira halo kedan konfirmasaun ho ata C ne’ebé partidu rekolla no hetan duni irregularidade iha rezultadu kontajen votu refere. Tanba ne’e, CNRT hakarak klarifika de’it katak husi ata B ne’ebé STAE no CNE atribui mai CNRT ne’e konsege identifika mosu manipulasaun iha sentru votasaun sira ne’ebé estabelese iha sentru votasaun no estasaun votu sira.
“Iha Dili laran identifika sentru votasaun ida iha sentru juveníl suku Lahane orientál hatudu katak rezultadu kontajen de votu ne’ebé fó sai ona partidu CNRT ninia votu loloos ne’ebé fiskais partidu CNRT lori mai sede kompletu ho asinatura husi fiskais partidu polítiku 17 no asinatura husi prezidente sentru votasaun ka prezidente meza ninia hamutuk 463.
Maibé iha fali ata B CNRT ninia rezultadu votu iha sentru juveníl mamuk, totál votu ida prienxe iha ata C ba partidu CNRT nian hamutuk 463 ne’e atribui fali ba partidu FRETILIN, depois partidu FRETILIN ninia votu loloos 163 ne’e atribui fali ba partidu UNDERTIM no UNDERTIM ninia votu 0 ne’e maka atribui fali mai CNRT.
“Ami konfirma kedan ata modelu C ne’e ho reprezentante CNE ninia iha sentru votasaun juveníl Lahane Oriental, sira ninia ata hanesan loloos ho ata CNRT nian ho nune’e ami bele konsidera katak depois STAE transforma rezultadu votu ba iha data base ne’e CNRT lakon tiha ninia votu 400-resin”, katak.
Ne’e duni partidu CNRT sei levanta irregularidade sira ne’e tuir dalan justisa, nune’e ba futuru CNE no STAE bele hala’o ninia servisu ho imparcialidade, labele mosu intervensaun husi partidu ne’ebé ka’er ukun atu nune’e instituisaun rua ne’ebé toma konta ba eleisaun sira ninia ekipa tékniku sira bele serbisu ho liberdade no transparánsia.
Notísia relevante: TR anunsia CNRT sai vensedór iha Eleisaun Parlamentár 2023
Jornalista: Tomé Amado
Editora: Maria Auxiliadora
